- bng.xinzodalimia - http://bng-xinzo.gzlab.eu -

O BNG solicita a anulación inmediata do proceso de contratación dun avogado do Concello

Posted By admin On 12/01/2012 @ 11:30 am In En destaque,Grupo Municipal,Mocións,Sala de imprensa | No Comments

O BNG de Xinzo rexeita a ocorrencia do alcalde, Antonio Pérez, de facerse cos servizos dun avogado en exclusiva, a cargo do orzamento municipal, ao tempo que sobe taxas e impostos e recorta servizos básicos.

Xinzo da Limia, 12 de xaneiro de 2012. No BOP do 30 de decembro do 2011 publicouse o anuncio de convocatoria dunha praza de letrado/a para o Concello. No BNG vimos de recoller a perplexidade e indignación dos veciños e veciñas de Xinzo que non entenden os motivos desta contratación nun servizo totalmente accesorio e marxinal que non ten ningunha consecuencia directa na súa calidade de vida. Resulta curioso e chamativo que Antonio Pérez, representante dunha forza como o PP, partidaria de privatizar prestacións básicas como a educación, a sanidade, a atención aos maiores e aos dependentes, etc. teña a ocorrencia de facerse cos servizos dun avogado propio cando hai sobrados motivos que desaconsellan a creación desta nova figura, ata o de agora inexistente no Concello de Xinzo, e que deberían levar a un alcalde sensato e que pense no interese xeral dos veciños e veciñas a desistir inmediatamente deste despropósito.

Estamos a falar dun Concello en permanente estado de excepción financeira, asfixiado no capítulo de ingresos, que recorta servizos básicos e que xa adica máis do 60% do orzamento a Gastos de Persoal ao que se lle vai engadir unha nova lousa en forma de praza de funcionario que non figura recollida na RPT e que, en ningún caso, lle vai saír aos veciños por menos de 65.000€ anuais. Coa creación deste novo posto estanse a incumprir vergoñentamente os compromisos adquiridos no famoso ‘Plan de Saneamento’, aprobado no ano 2009, que recollía explicitamente a “conxelación da oferta de emprego”, resulta impresentábel que este plan só sirva de escusa para subirlle os impostos aos veciños. E, finalmente, como o Sr. Pérez vai por libre e ao Sr. Rajoy non lle fan caso nin os seus, esta medida está a contradicir o acordado polo goberno do estado español, do propio PP, a través do Real Decreto-Lei 20/2011 que establece que “durante o ano 2012 non se procederá á incorporación de novo persoal, nin contratado, nin funcionarial a non ser por causa de forza maior”, o cal, evidentemente, non é o caso.

Queremos lembrarlle ao Sr. Pérez que o realmente produtivo sería reducir a conflitividade xudicial mediante unha xestión acaida dos intereses municipais e que o feito de dispor dun avogado propio non lle vai garantir gañar os procesos nos que se vexa envolto o que, a fin de contas, é o que realmente pode saír caro. Por isto o Grupo Municipal do BNG ven de presentar unha moción na que se lle pide ao actual goberno do PP a paralización inmediata deste proceso de contratación.


Article printed from bng.xinzodalimia: http://bng-xinzo.gzlab.eu

URL to article: http://bng-xinzo.gzlab.eu/2012/01/12/o-bng-solicita-a-anulacion-inmediata-do-proceso-de-contratacion-dun-avogado-do-concello/

URLs in this post:

[1] Nota de imprensa (pdf, 138kb): http://bng-xinzo.gzlab.eu/wp-content/uploads/20120112-np-bng-solicita-anulacion-proceso-contratacion-avogado.pdf

[2] Moción solicitude cancelación proceso selección letrado (pdf, 80kb): http://bng-xinzo.gzlab.eu/wp-content/uploads/20120112-mocion-praza-letrado.pdf