- bng.xinzodalimia - http://bng-xinzo.gzlab.eu -

O BNG de Xinzo rexeita o copago nos comedores escolares que pretende impoñer a Xunta do PP

Posted By admin On 15/04/2013 @ 3:00 pm In En destaque,Grupo Municipal,Mocións,Sala de imprensa | Comments Disabled

Levaremos ao próximo pleno unha moción rexeitando este novo copago e promoveremos accións informativas apoiando as mobilizacións de protesta das nais e pais afectados.

Xinzo da Limia, 12 de abril de 2013. O pasado 12 de marzo, o goberno do PP na Xunta de Galiza anunciaba a ampliación do copago do servizo de comedor escolar, un novo recorte no dereito á educación dos galegos e galegas. Con esta decisión o PP carga sobre as precarias economías das familias a obriga de facer fronte ao pago dun servizo necesario para garantir o Dereito á Educación.

Esta actuación do goberno do PP na Xunta de Galiza evidencia a súa despreocupación polo ensino público, provocando o seu deterioro polos sucesivos recortes dos últimos anos: recortes no número de profesores e profesoras, recortes nos orzamentos dos centros, recortes nas axudas para libros, nas axudas para bibliotecas, atrasos nas transferencias económicas para comedores escolares, recorte no servizo de comedores, empeoramento das condicións socio-laborais do profesorado, recortes nos servizos de normalización lingüística e unha longa cadea de despropósitos que deterioran un servizo público básico da sociedade.

Pola contra, todos estes recortes no ensino público contrastan cos 240 millóns de subvención ao ensino concertado, ou cos 3 millóns de euros de subvención para centros que segregan ao alumnado por razón de xénero que o propio Tribunal Superior de Xustiza de Galiza declarou ilegal.

O BNG de Xinzo levará ao próximo pleno unha moción rexeitando este novo copago e promoverá accións informativas apoiando as mobilizacións de protesta das nais e pais afectados por está decisión de Nuñez Feijóo que pretende facer caixa a conta da comida dos nenos e nenas dos centros públicos.


Article printed from bng.xinzodalimia: http://bng-xinzo.gzlab.eu

URL to article: http://bng-xinzo.gzlab.eu/2013/04/15/o-bng-de-xinzo-rexeita-o-copago-nos-comedores-escolares-que-pretende-imponer-a-xunta-do-pp/

URLs in this post:

[1] Nota de imprensa (pdf): http://bng-xinzo.gzlab.eu/wp-content/uploads/20130412-np-bng-rexeita-copago-comedores-escolares.pdf

[2] Moción de rexeitamento do copago nos comedores escolares (pdf): http://bng-xinzo.gzlab.eu/wp-content/uploads/20130412-mocion-copago-comedores-escolares.pdf