#ConstruíndoFUTURO, Asemblea Aberta. Xinzo, 10 de outubro, 20:30h, Casa da Cultura. Contamos contigo?

bng.xinzodalimia

07/07/2011

O BNG advirte que o goberno do PP vai resultar inoperativo e gravoso para Xinzo

O Alcalde, Antonio Pérez, crea unha “concellaría virtual” para xustificar a xenerosa adicación exclusiva que Montserrat Lama vai cobrar a conta dos veciños e veciñas.

Xinzo da Limia, 7 de xullo de 2011. Este venres, ao límite do prazo legal estipulado, celébrase o pleno organizativo do Concello de Xinzo. O alcalde, Antonio Pérez, artellou un goberno repartido en oito áreas (fronte ás seis da etapa anterior) que vai resultar inoperativo e gravoso para os cidadáns de Xinzo. Inoperativo porque hai áreas nas que se solapan as competencias, o cal propiciará as liortas internas como xa sucedeu no pasado, e gravoso porque este aumento artificioso de áreas vai levar aparellado un incremento dos gastos da operativa municipal.

Dende o BNG lamentamos que o “manual de estilo da austeridá de Feijóo” non chegara a tempo ás mans do noso alcalde, quen non rebaixa o importe das dietas por asistencia a órganos corporativos como reiteradamente veu reclamando o noso grupo no anterior mandato. A redución das dietas permitiría amortecer o impacto que supón o aumento do número de concelleiros electos, mais con esta medida aos “populares” non lle sairían as contas.

Por outra banda, a proposta de celebrar os plenos ordinarios ás 11:00h, cando tradicionalmente se viñan celebrando de tarde, tampouco permite albiscar moi boas intencións do Sr. Pérez ao respecto de facilitar a asistencia dos cidadáns aos mesmos.

Neste mandato a adicación exclusiva cambia de dona pasando a ser disfrutada pola concelleira do PP Montserrat Lama, á que se lle crea unha “concellaría virtual”, baleira de contido, para poder xustificar nominalmente o xeneroso soldo que vai a percibir a conta das veciñas e veciños de Xinzo. E o caso é que traballo na área de Persoal non lle ía faltar se puidera e quixera facelo, especialmente se temos en conta que a reorganización e racionalización da plantilla do Concello é prioritaria cunha RPT pendente de aplicación dende hai tres anos.

Desvío de fondos da Galescola para pagar as festas da Santa Mariña

Claro exemplo da incompetencia do recén estreado goberno está na primeira medida “operativa” que traen ao plenario, consistente na transferencia de 50.000€ de investimento na Galescola de Xinzo que se van empregar para financiar as festas da Santa Mariña. Por unha banda detráense cartos destinados a obras de mellora necesarias para a calidade deste servizo, e insistentemente demandadas polos pais e nais, e empréganse en pagar os festexos patronais, o cal tamén deixa en evidencia a imprevisión do PP que, cando aprobou os orzamentos hai uns meses, non sabía que as festas se celebran todos os anos no mes de xullo.

01/07/2011

O Goberno resposta a Pérez Bouza que o Concello de Xinzo non aportou a documentación técnica requerida para o proxecto náutico no Limia e dubida da súa viabilidade

Pérez Bouza perguntaba ao Goberno por este proxecto do concello e Portos de Galicia nun ámbito que é competencia da Confederación Hidrográfica e salientaba a sequedade do cauce do río durante varios meses ao ano

Madrid, 1 de xullo de 2011. O Goberno vén de respostar ás perguntas formuladas polo senado do BNG, Xosé Manuel Pérez Bouza, respeito ao proxecto do concello de Xinzo e de Portos de Galicia de construir un parque náutico no río Limia en Xinzo.

O senador do BNG dirixíase ao Goberno para perguntarlle polo proxecto de Parque Naútico no río Limia ao seu paso polo concello de Xinzo. Quería saber se a entidade pública Portos de Galiza ou o concello de Xinzo, soliciaron ante a Confederación Hidrográfica algún tipo de permiso para realizar este proxecto.

Ademáis, Pérez Bouza formulaba outro tipo de perguntas como se este plan se someteu á consideración da Confederación e se era viábel desde o punto de vista medio ambiental e social “construir un parque náutico no cauce dun río que permanece completamente seco durante varios meses ao ano”.

Neste sentido, o Goberno indica que o 22 de febreiro deste ano recibiu a solicitude do concello de Xinzo de Limia para a autorización do denominado “proxecto náutico fluvial no río Limia”, redactado polo ente público Portos de Galicia.

Informa o Goberno ao BNG que a documentación técnica aportada “resultou insuficiente” e que requeríu ao peticionario a documentación que falta. Iso sí o Executivo amosa as súas dúbidas sobre o proxecto ao sinalar que “si é certo que o réxime de caudais estivais do río Limia pode suscitar dúbidas respeito á súa execución”.

E precisamente, engade, “un dos obxectivos de ter requerido a documentación técnica é a de ter os elementos suficientes para poder avaliar se procede ou non esas actuacións en dominio público hidráulico”.

Un proxecto “insólito”

O senador do BNG lembraba na súa iniciativa parlamentar que hai pouco Portos de Galiza comprometeuse con concello de Xinzo a financiar a construción deste parque náutico, “á marxe do insólito da decisión é a primeira vez que Portos de Galiza anuncia que vai facer un investimento fóra do seu ámbito de actuación”. Considera o parlamentar nacionalista que a actuación anunciada non parece a máis axeitada debido á sequedade do río.

 Filed under: Sala de imprensa
21/06/2011

O BNG valora moi positivamente o rexeite da veciñanza de Gudín á instalación da incineradora

Amador Díaz esixe ao alcalde, Antonio Pérez, que dea a cara e ratifique agora a súa postura ao respecto da incineradora do sur na Limia.

Xinzo da Limia, 21 de xuño de 2011. O portavoz municipal do BNG de Xinzo, Amador Díaz, celebra moi positivamente a contundente negativa dos comuneiros do monte e da veciñanza de Gudín á instalación da Incineradora do Sur de Galiza na zona coñecida como “A Touza”, ao tempo que tamén esixirá na vindeira sesión plenaria a ratificación oficial do alcalde do PP, Antonio Pérez, na súa postura ao respecto da instalación dunha incineradora na Comarca da Limia.

Explicacións inmediatas pola iniciativa da Asemblea de Comuneiros

Neste sentido, Amador Díaz pedirá tamén explicacións inmediatas ao Sr. Pérez ao respecto da autoría da iniciativa de convocar esta asemblea de comuneiros do monte de Gudín para a posible instalación da Incineradora do Sur, advertíndolle que no suposto de que o promotor desta iniciativa fose tanto o alcalde como derivado da súa incoacción, e dado que estaría mentindo e incumprindo de xeito flagrante tanto o seu compromiso electoral coa veciñanza de Xinzo, así como os acordos plenarios municipais e provinciais tomados co total rexeitamento á situación desta instalación na comarca da Limia, pediremos a súa demisión irrevogábel e sen paliativos.

Malestar e alarma veciñal polo nocivo impacto ambiental da incineradora

Amador Díaz sospeita que, tanto o alcalde Antonio Pérez como o Presidente da Deputación, seguirán xogando á ruleta rusa co noso concello e comarca barallando novos emprazamentos para a incineradora dos 250 millóns de euros, como poden ser Sarreaus ou Xunqueira de Ambía, cando demostraron despois do caso de Gudín que non se pode facer unha escolla máis lesiva nun dos puntos de maior altitude do concello e que tamén ten o embalse que abastece de auga potábel a boa parte de Xinzo, o que cunha incineradora automaticamente convertería a Gudín nun auténtico reemisor de cancro e enfermidades, xa que segundo a propia O.M.S. estas instalacións duplican o risco de cancro infantil no radio inmediato de cinco quilómetros, ademais das múltiples patoloxías oncolóxicas asociadas a unha exposición prolongada ás súas emisións.

11/06/2011

Malas expectativas para os veciños e veciñas de Xinzo

20110611-capa

Na toma de posesión do novo alcalde viviuse un feito insólito e bochornoso na historia democrática do Concello de Xinzo. Logo de ser nomeado, o candidato do PP, Antonio Pérez, dirixiu un patético discurso aos congregados na sala no que non anunciou nin unha sola medida de goberno, nin deu a máis lixeira pincelada de por onde ten pensado que discorra a vida municipal nos vindeiros catro anos. Mais ben ao contrario, Antonio Pérez, un señor sen proxecto, movido pola súa mala conciencia e facendo bo o dito latino do “excusatio non petita, acusatio manifesta” o único que aproveitou foi para atacar á oposición e tentar xustificar as súas propias carencias democráticas internas como cabeza de lista dunha candidatura devaluada, de terceira división, cun partido roto en anacos como así o atestigua a propia composición da nova corporación.

No BNG, como líderes da oposición, faremos unha laboura intensa encamiñada a defender aos veciños e veciñas de Xinzo, non aos censados de última hora que logo de apoiar ao candidato popular marcharán de novo para os seus concellos e vixiaremos moi de preto as accións do goberno para denunciar as desfeitas, que seguramente se van producir, e tentar paliar na medida das nosas posibilidades as consecuencias das mesmas, como fixemos nos pasados catro anos.

16/05/2011

O BNG denuncia que Baltar quere mercar con diñeiro negro os votos dos cidadáns de Morgade

20110516-capa

O candidato do PP, Antonio Pérez, e o Presidente da Deputación, Baltar Pumar, tentan mercar aos veciños e veciñas de Morgade con 3000 euros en metálico.

Xinzo da Limia, 16 de maio de 2011. As artimañas, manobras suxas e chanchullos varios que estamos a ver durante esta campaña electoral no concello de Xinzo superan con creces todo o que viña sendo tradicional no PP. Ás coñecidas prácticas de compra individual de vontades con promesas de postos de traballo, ás ameazas a empresarios da vila con quedarse fóra do “pastel” se non se postulan abertamente a prol do candidato “popular”, e outras, engadiuse nos últimos días unha nova e insólita “técnica” impropia dunha sociedade democrática e que deixa ben ás claras a catadura moral destes individuos que aspiran a ocupar, que non gobernar, respectivamente Concello e Deputación. Este domingo a “caravana popular” estivo a pasear a Baltar, o vello, por varios pobos do concello de Xinzo nos que “aproveitou” para ameazar aos veciños e veciñas asegurando que, se gañaba Amador a alcaldía, tería pechadas as portas da Deputación. Mais a guinda púxoa no pobo de Morgade onde un veciño, logo de escoitar pacientemente a perorata de medidas baleiras e promesas que nunca pensan cumprir tanto de Baltar coma de Chavelleiro, lembroulle ao Presidente en funcións que todo iso estaba moi ben, mais levaban reclamando un equipo de aire acondicionado para o local social do pobo dende había anos, que xa llo prometeran varias veces e que aínda estaban a agardar por el. Diante deste “desplante” un arroutado Baltar, logo de proclamar que “a el ningún pedáneo o deixaba quedar mal”, dirixiuse resoltamente cara o maleteiro do seu Audi e tirouse de fato de billetes que foi poñendo un sobre outro por riba da mesa ata completar 3000 eurazos “del ala”, diante do pasmo dos presentes que ollaban entre sorprendidos e divertidos a operación preguntándose se acababan de asistir a un mitín do PP ou ao reparto dunha pedrea dos nenos de San Ildefonso. A dúbida que se lles plantexa agora aos veciños é a quen apoñerlle este diñeiro recibido “en negro”, se a unha subvención da Deputación ou a unha “donación particular” do propio Baltar Pumar.

A desesperación coa que os “populares” están a encarar a recta final desta campaña evidencia que ven máis preto ca nunca a perda respectivamente do Concello de Xinzo e da Deputación e calquera cousa vale con tal de seguir chuchando do erario público para manter o seu decimonónico aparato caciquil.

Desde o BNG tamén emprazamos ao Presidente da Xunta do PP, Núñez Feijoo, o home austero, a que avale este proceder dos seus correlixionarios ourensáns que cubican maleteiros de Audi con billetes de cincuenta euros e explique se esta é unha práctica habitual do seu partido en toda Galiza ou só se aplica no noso concello.

Manipulación do censo

Amador Díaz ven de recibir novas tarxetas censuais de “veciños pantasma” que conviven en domicilios de Xinzo sen coñecemento dos seus propietarios e moradores habituais. As mesmas serán remitidas á Fiscalía para continuar co procedemento iniciado hai uns días a instancia do BNG.

05/05/2011

O BNG non permitirá que o candidato do PP pague favores persoais cos cartos dos veciños e veciñas de Xinzo

20110505-capa

Antonio Pérez sáltase toda a legalidade vixente para consolidar nas súas prazas aos afíns que o apoiaron nas loitas polo poder dentro do PP local.

Xinzo da Limia, 5 de maio de 2011. Logo de que nas últimas datas viñeramos de recibir comunicacións de diferentes fontes alertándonos das prácticas fraudulentas, cando non claramente ilegais, que se estaban a levar por mandato directo e explícito do actual Alcalde e candidato do PP, Antonio Pérez, a gota que colmou o vaso e fixo saltar todas as alarmas foi un comentario publicado nunha web adicada a seguir a política municipal que nos merece a máis absoluta credibilidade porque só corrobora as informacións que xa coñeciamos:

“Soy una funcionaria del Ayuntamiento de Xinzo. Disculpad que no me exprese en gallego ya que mi dominio de éste es muy limitado. Puedo decir que dentro del cuadro laboral funcionario del concello tengo bastante antigüedad, sino la más antigua. Para sacar mi plaza de funcionaria tuve que pasar unha convocatoria pública con varias pruebas y concurso de méritos. Cosa que hoy no existe. Lo que el señor Antonio Pérez está haciendo a día de hoy en el ayuntamiento de Xinzo no tiene nombre. Está contratando a personas en fraude de ley, contra toda reglamentación de magistratura de trabajo, prorrogando contratos eventuales que superan tiempo permitido y, repito, en flagrante fraude de ley, contratos que al ser prorrogados adjudican al trabajador automaticamente la condición de funcionario sin ningún concurso ni oposición pública, simplemente a dedo. El último caso, según me comentan en el café de esta mañana compañeros del ayuntamiento es el de la señora de ****, de baja por maternidad y desde estos días nueva funcionaria del ayuntamiento. Esto no puede ser, no hay derecho y quiero denunciarlo en vuestro foro para que todo Xinzo sepa porque se dedican a la política estas personas” http://ir.gl/b2ff58

Os nosos peores temores estanse a confirmar e a xestión en materia de persoal, ao igual que en adxudicación de obra pública, do Sr. Pérez, non pensa nos intereses das veciñas e veciños de Xinzo se non que están claramente orientadas a pagar favores persoais e garantir lealdades de cara ás vindeiras eleccións do 22 de maio. Agora entendemos o interese do Sr. Pérez en contratar un avogado para a plantilla funcionarial do Concello, así mata dous paxaros dun tiro, crea unha nova praza para enchufar a algún achegado e de paso prepárase para un previsíbel incremento da conflitividade xudicial provocado pola súa neglixente actuación.

De pouco valeu o Pleno extraordinario celebrado no pasado mes de febreiro no que se solicitaba un cambio de rumbo na política de persoal. Antonio Pérez está a facer bo ao anterior alcalde e, se non se lle paran os pés nas urnas, leva camiño de converter ao noso Concello nunha Deputación II aplicando as políticas caciquís e de enchufismo do seu mentor político, o Sr. Baltar, a costa dos veciños e veciñas de Xinzo.

Como primeira medida o Grupo Municipal do BNG ven de rexistrar un escrito solicitando acceso a toda a información referente ás contratacións dos últimos meses para valorar as seguintes iniciativas a tomar.

01/04/2011

O troco de Alcalde non corrixe a deriva na xestión económica do Concello

No pleno ordinario do martes pasado o centro do debate xirou arredor de temas económicos xa que o actual alcalde, Antonio Pérez, presentaba á consideración dos grupos municipais os seus primeiros orzamentos. A nosa valoración inicial é que neste punto non se advirte ningún troco nin novidade: os orzamentos son os mesmos de todos os anos, aos que xa nos tiña afeitos Isaac Vila, uns orzamentos que hipotecan o presente e o futuro de Xinzo.

Orzamentos 2011

Este ano a cifra total ascende a 6.770.000€ e, coma sempre, o capítulo de persoal lévase a meirande parte dos cartos, en total 4 millóns de euros (60%), coa novidade de que se crea unha nova praza de LETRADO para representar ao Concello nos innumerabeis pleitos nos que está metido, praza que non aparece na famosa RPT (Relación de Postos de Traballo). Novamente o noso Alcalde da mostras da súa clarividencia xa que os técnicos da Universidade de Santiago que analizaron as necesidades do Concello non consideraron que precisase un abogado pero o señor Pérez, en escasos meses que leva no cargo detectou esta falta.

Os gastos correntes mantéñense nunha cifra similar á do ano pasado, levándose outro millón e medio de euros que sumados ao capítulo de persoal configuran o 83% do orzamento, deixando escasa marxe de manobra para actuacións produtivas.

Outra constante nos últimos anos era o aumento da carga impositiva sobre os veciños e veciñas de Xinzo e estes orzamentos non ían ser menos, prevese un incremento na recadación de impostos directos, indirectos e taxas para chegar a unha cifra de 4.160.000 euros. Desde que o PP retomou a alcaldía DUPLICOU a recadación deixando nun simple chiste ou nunha broma de mal gusto as cacarexadas promesas “populares” de redución de impostos.

O capítulo de investimentos, como consecuencia do explicado, resulta anecdótico ao representar un ridículo 7% do total do gasto, e aínda veremos o que se executa realmente porque a partida máis elevada (122 mil euros) é para unha futura ampliación da Galescola para a que, segundo recoñeceu o propio Sr. Pérez, non existe convenio asinado. O outro único investimento destacábel é o do Campo da Moreira xa que o resto de obras non pasan de ser meros arranxos sobre infraestruturas xa existentes.

Plan de Saneamento

Na orde do día deuse conta tamén da avaliación do cumprimento no exercicio 2010 do “Plan de Saneamento Económico-Financeiro”, que resultou informado DESFAVORÁBELMENTE pola Interventora municipal xa que se produciu un aforro neto negativo de -558 mil euros. O Alcalde, pouco interesado en falar do tema, pasou de puntillas sobre este punto e como non había lugar a votación nin sequera permitiu que se debatera o asunto. Non obstante dende o BNG temos que repetir o que levamos dicindo dende que se aprobou este plan hai dous anos: para o único que serve o Plan de Saneamento é para subirlle os impostos aos veciños e veciñas de Xinzo, xa que é o único punto que se aplica do mesmo, o resto de recomendacións (aforro de gastos correntes, redución de persoal, etc.) son fume en mans dun xestor inútil e incompetente.

Incineradora

A iniciativa conxunta de BNG e PSG-PSOE presentouse unha moción para rexeitar a posibilidade de instalar a incineradora que promove a Xunta do PP para queimar todo o lixo do sur de Galiza na Limia. O alcalde, Antonio Pérez, cos votos do seu grupo, desestimou a urxencia deste tema non sen antes asegurar que el tamén estaba en contra. Este feito non deixa de resultar un pouco paradóxico pois se tan en contra está… que problema tería en votar a favor da moción? Ademáis debemos dicir que está en contra… agora… xa que o 3 de febreiro deste ano estaba encantado coa posibilidade de que viñera a incineradora para Xinzo. Antonio Pérez tamén aproveitou para tildar de “electoralista” á Plataforma Veciñal que promoveu o movemento de rexeitamento a esta planta, esquecendo que os que prenderon a mecha foron el mesmo e o seu partido ao facer o anuncio de que esta incineradora podería vir para Xinzo contando “vender” os hipotéticos postos de traballo que optimistamente cifraban en cincocentos.

Lei de Augas de Galiza

O noso grupo presentou outra moción para solicitar da Xunta do PP a retirada da Lei de Augas de Galiza aprobada en outubro de 2010 e que, curiosamente, non terá efectos ata pasadas as eleccións municipais. Esta lei vai ser altamente prexudicial porque é unha lei exclusivamente recadadora. O PP aprobou esta lei para recadar máis cartos. Pagaremos pola auga da traída e dos pozos, mesmo pola auga da chuvia e a Xunta non mellorará a calidade da nosa auga e non se fará cargo do mantemento das traídas e pozos particulares. En Xinzo xa pagamos a auga máis cara de Galiza e con esta lei, lonxe de cumprirse a promesa do ex-alcalde Sr. Vila de que se gañaba o PP a Xunta baixaría o recibo da auga, todo o contrario, vai subir co cal se demostra unha vez máis que as promesas de Feijóo, Vila, Pérez, etc. son sinxelamente MENTIRAS.

Museo do Entroido

Outra moción de urxencia do PSG-PSOE reivindicaba a reactivación das obras do Museo Galego do Entroido. Neste punto o Sr. Pérez volveu dar mostras de non enterarse da “movida” xa que, por enésima vez, recurriu ao mito da suposta discriminación sufrida por Xinzo durante a etapa de Goberno Bipartito na Xunta, esquecendo, non sabemos se por malicia ou por ignorancia, que durante ese tempo o Concello non presentou ningún proxecto referido ao Museo para ser valorado polos responsábeis de Cultura dese goberno e esquecendo, tamén, que o “goberno amigo” do Sr. Feijóo leva xa dous anos en Santiago e aínda non mandou un peso para esta iniciativa, mais ben todo o contrario, o Sr. Rey Pichel, Director Xeral de Patrimonio Cultural, non tiña moito coñecemento do tema e, en todo caso, o de museo “galego” parecíalle un pouco excesivo.

Embarcadoiro do Limia

A instancias do BNG, Antonio Pérez explicou en que consistía o proxecto do embarcadoiro, laiándose da bricadeira que se facía popularmente coa idea e atribuindo a mesma ao descoñecemento real da actuación. Segundo aclarou o obxectivo é facer un pantalán, unha pasarela e unha caseta de madeira cun orzamento duns 200 mil euros que aporta Portos de Galiza. Non obstante a obra require do permiso da Confederación Hidrográfica, que xa remitiu un escrito poñendo en coñecemento do Sr. Pérez toda a documentación que precisa para obter o mesmo.

En resumo, o único que se notou co cambio de alcalde foi un cambio nos modos, o Sr. Pérez confunde contundencia con agresividade, liderazgo con imposición e xestión con chanchullos e componendas. O sucedido neste pleno é unha boa proba: continuidade nos orzamentos e na política de persoal, esquecemento deliverado do que non convén debater, tersiverxación interesada da realidade e reinterpretación teimuda da historia, desmontábel cun simple repaso das hemerotecas.

21/03/2011

Amador Díaz esíxelle ao alcalde que explique o proxecto do embarcadoiro

20110321-capa

Nunha rolda de prensa celebrada hoxe na que compareceron Amador Díaz, candidato á Alcaldía de Xinzo, Xosé Manuel Pérez, Senador, e Tereixa Paz, Deputada no Parlamento de Galiza, o BNG explicou que ven de presentar hai uns días unha iniciativa municipal para que o actual alcalde do PP, Antonio Pérez, explique no vindeiro Pleno a natureza do proxecto e do convenio asinados hai un mes co representante de Portos de Galiza, dependente da Consellaría do Mar, para a construción dun embarcadoiro deportivo no Río Limia por un importe de 200.000 euros.

Logo de varias semanas dende o insólito anuncio, que coincidiu no tempo co “globo sonda” da incineradora, non voltamos a ter noticias, nin se fixo ningunha aclaración ao respeito, malia a expectación que levantou a noticia entre os veciños e veciñas de Xinzo que agardan novas informacións que aclaren o alcance das obras e a súa viabilidade. Este silenzo fainos sospeitar que se trate dunha nova ocurrencia pre-electoral do noso alcalde coa que desviar a atención sobre os seus bandazos ao respeito da polémica incineradora que o PP proxecta instalar no sur de Galiza e sobre a cal a Xunta de Feijóo aínda non deu a coñecer a ubicación.

Novamente estamos diante dun proxecto-ocorrencia do PP, que malgasta os cartos dos galegos e galegas en obras faraónicas e inútis mentres as necesidades reais fican adiadas e esquecidas nun caixón, neste senso Amador reclamou que o que debería facer o alcalde é negociar coa Confederación Hidrográfica a limpeza do río, que precisa dunha intervención importante, realista e axeitada ás necesidades dos veciños, que garanta unha caudal mínimo todo o ano xa que, na actualidade, é un feito ben coñecido que o río baixa seco practicamente seis meses.

Páxinas: Anterior 1 2 3 4 5 6 7 8 ... 16 17 18 Seguinte

bng
2003-2013, Grupo Local do Bloque Nacionalista Galego de Xinzo da Limia
R/ Río Arnoia, 14 - Local 18 (Multicentro - 1ªandar) | 32630 Xinzo da Limia - Ourense (Galiza, UE) | Tlf/Fax: 988461360
www.bng-xinzo.org | @bngxinzo | info@bng-xinzo.org

Cretos | Privacidade e seguridade | Condicións de uso

Todo o contido desta web está baixo unha licenza Creative Commons Recoñecemento 3.0 se non se indica o contrario

209 queries - 0,247 segundos | Powered by WordPress