#ConstruíndoFUTURO, Asemblea Aberta. Xinzo, 10 de outubro, 20:30h, Casa da Cultura. Contamos contigo?

bng.xinzodalimia

11/06/2013

Contra a minaría salvaxe e contaminante

20130611-capa

O BNG solicitará o pronunciamento do Concello de Xinzo en contra da macro-minaría salvaxe mediante una moción presentada para o seu debate no vindeiro pleno.

Xinzo da Limia, 11 de xuño de 2013. A explotación dos recursos mineiros, e particularmente dos metais, está controlada por grandes empresas transnacionais que operan baixo criterios especulativos aplicando prácticas neocoloniais. O seu alto prezo nos mercados fai que procuren beneficio rápido a costa do grave impacto ambiental e riscos para a saúde das persoas.

Corcoesto, en Bergantiños, O Ribeiro, Celanova, as Fragas do Eume, a Serra do Galiñeiro, a Terra Chá ou a Limia están baixo esta ameaza. Na Galiza existen 520 explotacións mineiras e as concesións chegan a abranguer máis da metade da superficie do país. A maior parte destas foron autorizadas e perviven na actualidade grazas a normas aprobadas no réxime franquista. Nin a Xunta de Galiza nin o goberno do Estado teñen o menor interese en mudar esta situación. O Plan Sectorial de Actividades Extractivas, encargado ás empresas do sector mineiro (Cámara Mineira de Galiza) e furtado á participación das entidades sindicais, ambientalistas, veciñais e profesionais, ameaza espazos naturais protexidos e os concellos e as persoas afectadas non contan, tampouco a ordenación urbanística local.

A minaría a ceo aberto e a fractura hidráulica ou “fracking” son actividades con graves impactos sobre o medio ambiente. Trátase dunha minaría salvaxe, que produce a destrución física do territorio, elimina e contamina o solo e os acuíferos, consume grandes cantidades de enerxía e auga e manexa substancias tóxicas que poden ter graves consecuencias. Pon en perigo a saúde, a calidade de vida, os recursos e os medios de vida tradicionais e sustentábeis das persoas. Os supostos (e sempre interesadamente esaxerados) beneficios non compensan os prexuízos ambientais e socio-económicos derivados en outros recursos naturais, forestais, agro-gandeiros, pesqueiros, hídricos, de lecer ou turísticos, e para a saúde humana.

Existe un clamor para que se suspendan os permisos e concesións en tramitación, que se prohiba a macro-minaría a ceo aberto e a minaría con cianuro. Galiza debe ser soberana na explotación dos seus recursos, o aproveitamento dos mesmos debe ser considerado estratéxico, decidido desde aquí en función dos nosos intereses e tutelado desde os poderes públicos para garantir a sustentabilidade ambiental e social dos proxectos.

A ameaza dos feldespatos na Limia persistirá mentres non se mude a lei

Dende o BNG seguiremos a reclamar unha lexislación que nos blinde definitivamente contra este tipo de minaría, xa que nada impide que a explotación de feldespatos volte ao ataque nun futuro próximo cunha normativa máis favorábel, nin que novos proxectos, como o LUIS-4943 que denunciamos hai unhas semanas, ou outros novos poidan botar a andar en calquera intre.

15/05/2013

Un novo proxecto mineiro de explotación dunha canteira de granito bota a andar en Xinzo

20130515-capa

O BNG insta á Xunta de Galiza e máis ao Concello de Xinzo a que aclaren se autorizaron esta investigación e extracción de catas realizadas hai uns meses con nocturnidade para non levantar receos nos veciños e veciñas dos pobos máis próximos.

Xinzo da Limia, 15 de maio de 2013. A aposta decidida da Xunta do PP por vender o país por parcelas podería abrir novas frontes na comarca da Limia, afectada pola coñecida mina de feldespato que tanto rexeite social está a xerar, xa que o BNG de Xinzo ven de ser alertado da realización de catas nas proximidades dos pobos de Faramontaos e Seoane de Oleiros, no sitio coñecido como ‘A Ribeira’.

Estas catas puideron ser constatadas sobre o terreo e correspóndense co permiso de investigación do dereito mineiro LUIS 4943 que caducou a finais do 2011. Nembargantes veciños da zona afirman que as catas se realizaron a principios deste ano e que os traballos se facían de noite, supostamente coa intención de pasar desapercibidos e non levantar receos nos veciños e veciñas dos pobos máis próximos.

O dereito mineiro OU/C/04943 LUIS abarca unha extensión de 12 cuadrículas mineiras, atópase ubicado no triángulo entre Faramontaos, Novás e Seoane de Oleiros e o recurso dispoñíbel na zona é o granito ornamental que sería explotado mediante unha canteira a ceo aberto.

Dende o BNG pedimos á Xunta de Galiza e máis ao Concello de Xinzo que aclaren se autorizaron esta investigación e extracción de catas sobre o terreo sen comunicación algunha á veciñanza nin interesados, así mesmo solicitamos a paralización inmediata deste novo expediente mineiro.

Ameaza global coa complicidade da Xunta do PP

Esta nova pon de manifesto que a ameaza dos proxectos mineiros é global diante da ofensiva da Xunta do PP (sintetizada no lema “Galiza é unha mina”) de apostar por este tipo de explotacións propias dos países cunha economía colonizada por potencias estranxeiras.

Apoio ás mobilizacións e protestas dos veciños e veciñas contra a mina de feldespato

Diante desta ameza global a resposta dos cidadáns debe ser unánime, por iso, o BNG apoia a tractorada convocada pola Plataforma Veciñal Corno do Monte para o vindeiro sábado, 25 de maio, e anima a todos os veciños e veciñas de Xinzo a sumarse á protesta como único xeito de paralizar un proxecto que xa conta con todas as bendicións da Xunta do PP, como se constata nos informes emitidos polas diferentes consellarías.

23/01/2013

O BNG alerta que a concesión mineira Faramontaos 5089 ‘vai para adiante’ ao entrar en fase de exposición pública o proxecto de explotación

Xinzo da Limia, 23 de xaneiro de 2013. O pasado xoves, 17 de xaneiro, apareceu publicado no DOG nº12 o anuncio de información pública do Proxecto de explotación, estudo de impacto ambiental e plan de restauración da concesión de explotación derivada do permiso de investigación Faramontaos, nº5089.1. Este anuncio deixa ben ás claras a intención da empresa de levar adiante a iniciativa malia oposición frontal dos veciños e veciñas dos pobos afectados, sintetizada mediante a recollida de varios centos de alegacións e plasmada nun acordo plenario unánime de rexeitamento aprobado o 19 de xullo de 2012.

Trátase dunha explotación mineira de feldespatos a ceo aberto mediante un sistema de dragado ata un máximo de 15m de profundidade e que prevé un investimento de 1,2M de euros para criar dez postos de traballo. A concesión estenderíase ao longo de 30 anos afectando en diferentes fases a un total de 400ha de terreo cultivábel nas inmediacións dos núcleos de San Pedro, Fiestras e Moreiras. Cómpre salientar que ao remate do aproveitamento estas parcelas serán irrecuperábeis para o seu uso agrícola xa que o proxecto de restauración contempla que queden en forma de lagoas. A planta de tratamento estará escasamente a 600m do pobo de San Pedro e funcionará as 24 horas do día en tres turnos de traballo atendida por dous operarios. As labouras de extracción da draga realizaranse a un único turno.

Para o Grupo Municipal do BNG estamos diante dunha cuestión de extrema gravidade ao afectar directamente a un piar básico da comarca como é o agro, dada a agresividade do proxecto, e que non se xustifica de ningún xeito no impacto na economía local, que será ridículo cando non absolutamente negativo. Por este motivo o BNG porá en marcha, a través da súa deputada no Parlamento de Galiza, Tareixa Paz, novas iniciativas encamiñadas a que as consellarías implicadas deneguen os permisos para esta explotación. Asemade instaremos ao Concello e aos veciños e veciñas afectados a persoarse no procedemento aberto de alegacións manifestando novamente a súa frontal oposición.

18/07/2012

O BNG esixe ó Alcalde de Xinzo que desautorice unha concesión mineira proxectada nas concentracións parcelarias anexas ó río Faramontaos

Para o Grupo Municipal do BNG estamos diante dunha cuestión de extrema gravidade que esixe a máxima prioridade, especial dedicación, rigor e interese por parte dos responsábeis municipais ao afectar directamente á un piar básico da economía dos nosos veciños como é o agro, comprometendo directamente a viabilidade de 400 Has e indirectamente a totalidade das veigas de terra útil concentrada das parroquias de San Pedro, Laroá, Fiestras, Rebordechá, Paredes, Moreiras, Faramontaos e Seoane, dada a agresividade e forte impacto do proxecto.

É por este motivo que o BNG ven de celebrar coa presenza da deputada Tareixa Paz unha serie de xuntanzas informativas veciñais nestes núcleos rurais de Xinzo alertando das terribles consecuencias deste proxecto mineiro para o agro, a economía e o medo ambiente da zona. Por outra banda, tamén se está a informar a veciñanza que asemade das alegacións, mocións presentadas ou dos acordos tomados polos distintos grupos políticos no Pleno Extraordinario que se celebrará o vindeiro xoves ao respecto, e ao abeiro da LEI 3/2008 do 23 de maio de ordenación da minería da Galiza, Título IV Dereitos Mineiros, Capítulo I Procedemento de outorgamento dos dereitos mineiros, Artigo 22 Informe Municipal preceptivo, o BNG de Xinzo da Limia esixe o Alcalde-Presidente do Concello que proceda a redacción dos informes técnicos municipais preceptivos que contempla a devandita Lei, informes DESFAVORABLES que detallen e xustifiquen a nefasta incidencia e forte impacto negativo que o devandito proxecto Faramontaos 5089 supón tanto no eido económico, ambiental, social como agropecuario da zona E ASÍ DESAUTORICE taxativamente este procedemento de outorgamento de dereito mineiro, para o que dispón dun prazo de dous meses.

Así mesmo e ante a pasividade manifesta do PP que ceibou todo o seu rexeite na simple sinatura de alegacións, o BNG a través da súa deputada Tareixa Paz porá en marcha nesta mesma semana no Parlamento da Galiza unha serie de iniciativas encamiñadas a que as Consellerías do Medio Rural e do Medio Ambiente rexeiten de xeito frontal tamén este procedemento administrativo cos seus preceptivos informes técnicos desfavorables.

01/11/2011

O BNG esixe ó Alcalde de Xinzo que deixe de crispar á veciñanza de Gudín

O BNG reclama a Antonio Pérez que devolva a normalidade a veciñanza de Gudín, moi preocupada pola planta de lixo.

Xinzo da Limia, 1 de novembro de 2011. O portavoz municipal de Xinzo, Amador Díaz Penín, tralo enorme malestar e crispación vividos o pasado domingo nunha xuntanza de comuneiros do monte do término municipal de Gudín, onde mesmo chegou a intervir a Policía Local de Xinzo para manter o orden público, esixe que “o alcalde Antonio Pérez devolva a normalidade ó pobo de Gudín onde ata o de agora a xente vivía moi tranquila, en paz e sen ningún tipo de problemas nin co monte, nin co lixo nin con nada”.

Gran interese do alcalde pola situación da planta de lixo en Gudín.

Neste sentido, Amador Díaz denuncia que “o que debería explicarnos a todos o señor alcalde do PP Antonio Pérez, ós de Gudín e do resto de Xinzo, é o por que dise gran interese seu en traer unha planta de basura aquí e aínda por enriba darlle o servizo a unha empresa SOREVA S.L., tapadeira de outras, que non ofrece ningunha garantía na correcta xestión do lixo e que en Murcia a semana pasada o goberno autónomo lle pechou un vertedeiro ilegal en Abanilla”.

05/10/2011

O BNG lamenta a teima do Alcalde de Xinzo en querer converter á Limia no vertedoiro do sur de Galiza

20111005-capa

Amador Díaz denuncia a actitude covarde do alcalde do PP, Antonio Pérez, que non dá a cara e delega nun técnico alleo ao Concello a explicación do proxecto.

Xinzo da Limia, 5 de outubro de 2011. No día de onte, auspiciada polo grupo de goberno do PP no Concello de Xinzo co seu Alcalde á cabeza, Antonio Pérez, celebrouse na Casa da Cultura unha xuntanza para a “presentación” do proxecto dunha Planta de Tratamento de Refugallos promovida por unha firma murciana. No decorrer da mesma un técnico en representación da citada empresa degrañou as “virtudes” do proceso de “valorización” aplicado ao lixo, nun intento superfluo de convencer aos presentes da súa comenencia pois os “convidados”, na súa maioría seguidores populares, xa estaban convencidos de antemán e non precisaban de moitos máis adobíos técnicos que nin entenderon nin lles interesaban. Este proxecto resúmese nos seguintes puntos chave: un investimento de 50 millóns de euros, unhas instalacións de 60 mil metros cadrados e 200 postos de traballo directos nunha planta que trataría 150.000 toneladas de lixo ao ano, que se valorizaría en forma de abono orgánico (compost), materiais de reciclaxe (papel, vidro, plástico, metais, etc.) e CDR (combustíbel derivado de refugallos), deixando un “resto” non recuperábel, estimado nun 4% do total, que iría a un vertedoiro anexo.

Deixando a un lado a valoración técnica, para o BNG resulta intolerábel a actitude política do Alcalde, Antonio Pérez, agochado na primeira fila xunto ao resto do seu grupo, asistindo como simple espectador ao acto, nun patético intento de situarse a unha falsa equidistancia do proxecto cando na realidade el é o principal valedor e mentor do mesmo, como declarou aos medios logo de visitar unha planta similar que esta empresa ten en Murcia. No BNG non terminamos de entender os continuos bandazos deste alcalde que primeiro dixo si á Incineradora da Xunta do PP, logo dixo non, e agora volta a dicir si a esta planta de tratamento. Novamente imos ter que ser os veciños e veciñas de Xinzo os que o convenzamos para que mude de opinión coa nosa mobilización e rexeitamento.

Postos de traballo de ínfima cualificación

O principal e único argumento co que o PP nos quere “vender” este proxecto é o dos 200 postos de traballo directos que calculan se poderían crear nas sucesivas fases da súa implantación. Máis unha vez o modelo do PP está claro: privatización de servizos públicos e precarización das condicións de traballo. Sen entrar na análise das repercusións negativas que a presencia desta planta ocasionaría para o principal cultivo da nosa comarca, resulta chamativa a pouca estima e nula ambición que o Sr. Pérez ten para os seus conveciños ao condenalos a uns “empregos lixo” cunha cualificación ínfima que propiciará unha elevada rotación e temporalidade e, consecuentemente, salarios míseros de auténtica subsistencia. No BNG apostamos por outro futuro para a Limia, diferente ao dun PP que nos quere situar no mapa dos vertedoiros de Galiza como xa ten demostrado coa Planta de Tratamento de Refugallos da Construción. Apostamos polo impulso institucional á instalación na nosa comarca de empresas respectuosas co medio, non contaminantes, fundamentalmente empresas agro-gandeiras, que permitiran tirar un valor engadido da nosa produción creando postos de traballo estábeis, sostíbeis e cualificados.

Acto público do BNG. Outro modelo de crecemento para Xinzo é posíbel

Co obxectivo de explicar o noso posicionamento e alternativas sobre este e outros temas, o BNG convida aos veciños e veciñas a un acto público aberto o vindeiro sábado, 8 de outubro, ás 20:30h no Salón de Plenos do Concello de Xinzo, no que o noso senador e cabeza de lista por Ourense, Xosé Manuel Pérez Bouza, debullará as propostas para a Limia de cara ás vindeiras eleccións xerais do 20 de novembro.

21/06/2011

O BNG valora moi positivamente o rexeite da veciñanza de Gudín á instalación da incineradora

Amador Díaz esixe ao alcalde, Antonio Pérez, que dea a cara e ratifique agora a súa postura ao respecto da incineradora do sur na Limia.

Xinzo da Limia, 21 de xuño de 2011. O portavoz municipal do BNG de Xinzo, Amador Díaz, celebra moi positivamente a contundente negativa dos comuneiros do monte e da veciñanza de Gudín á instalación da Incineradora do Sur de Galiza na zona coñecida como “A Touza”, ao tempo que tamén esixirá na vindeira sesión plenaria a ratificación oficial do alcalde do PP, Antonio Pérez, na súa postura ao respecto da instalación dunha incineradora na Comarca da Limia.

Explicacións inmediatas pola iniciativa da Asemblea de Comuneiros

Neste sentido, Amador Díaz pedirá tamén explicacións inmediatas ao Sr. Pérez ao respecto da autoría da iniciativa de convocar esta asemblea de comuneiros do monte de Gudín para a posible instalación da Incineradora do Sur, advertíndolle que no suposto de que o promotor desta iniciativa fose tanto o alcalde como derivado da súa incoacción, e dado que estaría mentindo e incumprindo de xeito flagrante tanto o seu compromiso electoral coa veciñanza de Xinzo, así como os acordos plenarios municipais e provinciais tomados co total rexeitamento á situación desta instalación na comarca da Limia, pediremos a súa demisión irrevogábel e sen paliativos.

Malestar e alarma veciñal polo nocivo impacto ambiental da incineradora

Amador Díaz sospeita que, tanto o alcalde Antonio Pérez como o Presidente da Deputación, seguirán xogando á ruleta rusa co noso concello e comarca barallando novos emprazamentos para a incineradora dos 250 millóns de euros, como poden ser Sarreaus ou Xunqueira de Ambía, cando demostraron despois do caso de Gudín que non se pode facer unha escolla máis lesiva nun dos puntos de maior altitude do concello e que tamén ten o embalse que abastece de auga potábel a boa parte de Xinzo, o que cunha incineradora automaticamente convertería a Gudín nun auténtico reemisor de cancro e enfermidades, xa que segundo a propia O.M.S. estas instalacións duplican o risco de cancro infantil no radio inmediato de cinco quilómetros, ademais das múltiples patoloxías oncolóxicas asociadas a unha exposición prolongada ás súas emisións.

13/02/2011

O BNG non permitirá o tradicional “modus operandi” do PP no tema da incineradora

O actual Alcalde, Antonio Pérez, en vez de criticar aos veciños e veciñas, debería posicionarse claramente e esixir á Xunta transparencia nun tema tan grave.

Xinzo da Limia, 13 de febreiro de 2011. Logo da resposta pola prensa do actual alcalde do PP, Antonio Pérez, sobre a polémica incineradora, dende o BNG temos que manifestar o noso asombro e desconcerto polas manifestacións deste señor. Estamos moi acostumados ao “modus operandi” do Partido Popular neste tipo de cuestións: primeiro van soltando globos sonda para pulsar a reacción da xente, dicindo sen dicir, propoñendo sen propoñer, ata que chega o momento dos feitos consumados, cando xa non hai volta atrás. En Xinzo temos un caso ben recente: a Planta de Refugallos de Morgade, sen licenza, sen información aos veciños, en contra deles, que a día de hoxe segue sendo ilegal e que estando xa as máquinas realizando as obras non había constancia ningunha no Concello do que se estaba a facer. Antonio Pérez, daquela Concelleiro de Medio Ambiente e Deputado Provincial, tamén afirmaba non saber nada, e malia as denuncias e advertencias do BNG, non amosou o menor interese pola situación nin se preocupou de defender aos veciños afectados, converténdose nunha mera correa de transmisión das ordes que lle viñan ditadas dende “arriba”.

No caso da incineradora o Grupo Local do BNG de Xinzo non vai consentir o mesmo proceder, porque están a xogar co futuro de toda unha comarca, o simple feito de plantexar a candidatura da Limia para instalar unha incineradora destas características di moito da capacidade mental e de xestión dos dirixentes “populares”, a comezar polo presidente da Xunta do PP, Núñez Feijóo, ben coñecido nestas terras polas súas mentiras de campaña a respeito do tema da ZEPA, seguindo por un irresponsábel Presidente da Deputación, José Luis Baltar, metido a axente inmobiliario e rematando por un mediático e conciliador Alcalde, Antonio Pérez, que un día non sabe nada, ao seguinte parécelle boa idea e ao outro nin unha cousa nin a contraria.

Repetimos unha vez máis, o BNG rexeita rotundamente a proposta de ubicar no Polígono Empresarial de Xinzo, na Limia ou en Ourense a planta incineradora do sur de Galiza por irresponsábel, tramposa, agresiva e ameazante para o noso futuro e o dos nosos fillos. O PP de Feijóo, Baltar e Pérez deberían impulsar a instalación na nosa comarca de empresas respectuosas co medio, non contaminantes, fundamentalmente empresas agro-gandeiras, que permitiran tirar un valor engadido da nosa produción de pataca, cereal, etc. e creasen postos de traballo estábeis, sostíbeis e cualificados.

Dende o BNG estaremos a carón dos veciños e veciñas formando parte da Plataforma constituída o pasado venres, seguiremos utilizando todos os medios ao noso alcance para facerlle chegar á xente o alcance real desta instalación e apoiaremos calquera medida que impida esta desfeita, ao tempo que esixiremos ao actual alcalde “popular” un posicionamento claro de rexeitamento.

Páxinas: 1 2 3 4 5 Seguinte

bng
2003-2013, Grupo Local do Bloque Nacionalista Galego de Xinzo da Limia
R/ Río Arnoia, 14 - Local 18 (Multicentro - 1ªandar) | 32630 Xinzo da Limia - Ourense (Galiza, UE) | Tlf/Fax: 988461360
www.bng-xinzo.org | @bngxinzo | info@bng-xinzo.org

Cretos | Privacidade e seguridade | Condicións de uso

Todo o contido desta web está baixo unha licenza Creative Commons Recoñecemento 3.0 se non se indica o contrario

208 queries - 0,221 segundos | Powered by WordPress