#ConstruíndoFUTURO, Asemblea Aberta. Xinzo, 10 de outubro, 20:30h, Casa da Cultura. Contamos contigo?

bng.xinzodalimia

15/05/2013

Un novo proxecto mineiro de explotación dunha canteira de granito bota a andar en Xinzo

20130515-capa

O BNG insta á Xunta de Galiza e máis ao Concello de Xinzo a que aclaren se autorizaron esta investigación e extracción de catas realizadas hai uns meses con nocturnidade para non levantar receos nos veciños e veciñas dos pobos máis próximos.

Xinzo da Limia, 15 de maio de 2013. A aposta decidida da Xunta do PP por vender o país por parcelas podería abrir novas frontes na comarca da Limia, afectada pola coñecida mina de feldespato que tanto rexeite social está a xerar, xa que o BNG de Xinzo ven de ser alertado da realización de catas nas proximidades dos pobos de Faramontaos e Seoane de Oleiros, no sitio coñecido como ‘A Ribeira’.

Estas catas puideron ser constatadas sobre o terreo e correspóndense co permiso de investigación do dereito mineiro LUIS 4943 que caducou a finais do 2011. Nembargantes veciños da zona afirman que as catas se realizaron a principios deste ano e que os traballos se facían de noite, supostamente coa intención de pasar desapercibidos e non levantar receos nos veciños e veciñas dos pobos máis próximos.

O dereito mineiro OU/C/04943 LUIS abarca unha extensión de 12 cuadrículas mineiras, atópase ubicado no triángulo entre Faramontaos, Novás e Seoane de Oleiros e o recurso dispoñíbel na zona é o granito ornamental que sería explotado mediante unha canteira a ceo aberto.

Dende o BNG pedimos á Xunta de Galiza e máis ao Concello de Xinzo que aclaren se autorizaron esta investigación e extracción de catas sobre o terreo sen comunicación algunha á veciñanza nin interesados, así mesmo solicitamos a paralización inmediata deste novo expediente mineiro.

Ameaza global coa complicidade da Xunta do PP

Esta nova pon de manifesto que a ameaza dos proxectos mineiros é global diante da ofensiva da Xunta do PP (sintetizada no lema “Galiza é unha mina”) de apostar por este tipo de explotacións propias dos países cunha economía colonizada por potencias estranxeiras.

Apoio ás mobilizacións e protestas dos veciños e veciñas contra a mina de feldespato

Diante desta ameza global a resposta dos cidadáns debe ser unánime, por iso, o BNG apoia a tractorada convocada pola Plataforma Veciñal Corno do Monte para o vindeiro sábado, 25 de maio, e anima a todos os veciños e veciñas de Xinzo a sumarse á protesta como único xeito de paralizar un proxecto que xa conta con todas as bendicións da Xunta do PP, como se constata nos informes emitidos polas diferentes consellarías.

18/07/2012

O BNG esixe ó Alcalde de Xinzo que desautorice unha concesión mineira proxectada nas concentracións parcelarias anexas ó río Faramontaos

Para o Grupo Municipal do BNG estamos diante dunha cuestión de extrema gravidade que esixe a máxima prioridade, especial dedicación, rigor e interese por parte dos responsábeis municipais ao afectar directamente á un piar básico da economía dos nosos veciños como é o agro, comprometendo directamente a viabilidade de 400 Has e indirectamente a totalidade das veigas de terra útil concentrada das parroquias de San Pedro, Laroá, Fiestras, Rebordechá, Paredes, Moreiras, Faramontaos e Seoane, dada a agresividade e forte impacto do proxecto.

É por este motivo que o BNG ven de celebrar coa presenza da deputada Tareixa Paz unha serie de xuntanzas informativas veciñais nestes núcleos rurais de Xinzo alertando das terribles consecuencias deste proxecto mineiro para o agro, a economía e o medo ambiente da zona. Por outra banda, tamén se está a informar a veciñanza que asemade das alegacións, mocións presentadas ou dos acordos tomados polos distintos grupos políticos no Pleno Extraordinario que se celebrará o vindeiro xoves ao respecto, e ao abeiro da LEI 3/2008 do 23 de maio de ordenación da minería da Galiza, Título IV Dereitos Mineiros, Capítulo I Procedemento de outorgamento dos dereitos mineiros, Artigo 22 Informe Municipal preceptivo, o BNG de Xinzo da Limia esixe o Alcalde-Presidente do Concello que proceda a redacción dos informes técnicos municipais preceptivos que contempla a devandita Lei, informes DESFAVORABLES que detallen e xustifiquen a nefasta incidencia e forte impacto negativo que o devandito proxecto Faramontaos 5089 supón tanto no eido económico, ambiental, social como agropecuario da zona E ASÍ DESAUTORICE taxativamente este procedemento de outorgamento de dereito mineiro, para o que dispón dun prazo de dous meses.

Así mesmo e ante a pasividade manifesta do PP que ceibou todo o seu rexeite na simple sinatura de alegacións, o BNG a través da súa deputada Tareixa Paz porá en marcha nesta mesma semana no Parlamento da Galiza unha serie de iniciativas encamiñadas a que as Consellerías do Medio Rural e do Medio Ambiente rexeiten de xeito frontal tamén este procedemento administrativo cos seus preceptivos informes técnicos desfavorables.

26/10/2011

O BNG acusa ao Alcalde de Xinzo de enganar aos veciños ao subir outra vez taxas e impostos

Amador Díaz denuncia as mentiras do alcalde do PP, Antonio Pérez, que recentemente asegurara que non tiña intención de subir ningún imposto.

Xinzo da Limia, 26 de outubro de 2011. No pleno ordinario celebrado no día de hoxe certificouse a absoluta falla de credibilidade, de seriedade e incluso de competencia para o desenvolvemento das súas funcións do Alcalde de Xinzo, Antonio Pérez. Pasaron escasamente tres meses desde que afirmara taxante nunha entrevista que “Polo de agora en Xinzo de Limia non temos intención de subir imposto algún” (LVG, 19-7-2011) e, polo que se ve, as boas intencións duráronlle pouco xa que no pleno de hoxe o PP aprobou unha suba xeneralizada de taxas, así como do IBI e a creación dunha demencial nova taxa por “obradoiros culturais” que pretenden cobrar a todos os veciños e veciñas que fagan uso das instalacións municipais para desenrolar actividades deste tipo.

As taxas por abastecemento de auga e polo tratamento e depuración de augas residuais, unhas das máis caras de todo Galiza pola prestación destes servizos básicos, veranse incrementadas novamente, co agravante de que serán repercutidas a todos os veciños e veciñas independentemente de que dispoñan ou non do servizo de depuración (hai numerosas rúas e pobos cun saneamento deficiente cando non inexistente) ou da calidade da auga subministrada.

No caso do IBI a suba experimentada será dun 16% debido aos efectos acumulativos de incrementar a base impoñíbel nun 3,1% e de aplicar os novos tipos do 0,40 en rústica e 0,45 en urbana. A escusa neste caso é o famoso “Plan de Saneamento Económico-Financeiro” do que o PP só se lembra no referente a subir impostos, mais esquece no resto de medidas de redución de gastos correntes, persoal, etc.

Moción de cara á galería no tema da ZEPA

O PP de Xinzo, nesta nova andaina baixo o mando de Antonio Pérez, adoptou o curioso costume de auto-presentarse mocións para auto-aprobalas nun intento vano de tapar as súas vergonzas diante de veciños afectados polas decisións que se toman desde o propio PP en Santiago. Neste senso no pleno anterior traíannos o tema do Regadío e o de hoxe non foi a excepción coa moción do Grupo Popular reclamando da Xunta que negocie o Plan de Xestión da ZEPA da Limia cos afectados. En primeiro lugar hai que lembrarlle ao Sr. Alcalde que esta foi unha petición reiterada do BNG que xa se materializou en mocións aprobadas pola anterior corporación. Por outra banda a Xunta xa aprobou un Plan Director da Rede Natura 2000 que regulará os usos agrícolas na superficie ZEPA, deste plan o Sr. Pérez non tiña coñecemento e fixo firme propósito de informarse (LVG, 5-8-2011). Non entendemos cal é o obxectivo do PP ao presentar estas mocións, salvo quedar ben de cara á galería, o que ten que facer o Sr. Pérez é descolgar o teléfono e chamar a Feijóo para esixirlle que cumpra as súas promesas con respecto á Limia que para iso son do mesmo partido, ou iso din.

Planta de Tratamento de Refugallos

Outro anuncio importante do pleno de hoxe foi a “firme intención” dun despreocupado Alcalde por traer para Xinzo a Planta de Tratamento de Refugallos promovida pola empresa murciana SOREVA, detrás da cal está o empresario Ángel Fenoll, acusado de corrupción e delitos medio-ambientais. Ao Sr. Pérez non lle importa o pasado deste elemento e, acubillándose na “teoría do mal menor” afirma que sería o mellor xeito de “neutralizar” a intención da Xunta do PP de instalar na Limia a Incineradora do Sur de Galiza.

05/10/2011

O BNG lamenta a teima do Alcalde de Xinzo en querer converter á Limia no vertedoiro do sur de Galiza

20111005-capa

Amador Díaz denuncia a actitude covarde do alcalde do PP, Antonio Pérez, que non dá a cara e delega nun técnico alleo ao Concello a explicación do proxecto.

Xinzo da Limia, 5 de outubro de 2011. No día de onte, auspiciada polo grupo de goberno do PP no Concello de Xinzo co seu Alcalde á cabeza, Antonio Pérez, celebrouse na Casa da Cultura unha xuntanza para a “presentación” do proxecto dunha Planta de Tratamento de Refugallos promovida por unha firma murciana. No decorrer da mesma un técnico en representación da citada empresa degrañou as “virtudes” do proceso de “valorización” aplicado ao lixo, nun intento superfluo de convencer aos presentes da súa comenencia pois os “convidados”, na súa maioría seguidores populares, xa estaban convencidos de antemán e non precisaban de moitos máis adobíos técnicos que nin entenderon nin lles interesaban. Este proxecto resúmese nos seguintes puntos chave: un investimento de 50 millóns de euros, unhas instalacións de 60 mil metros cadrados e 200 postos de traballo directos nunha planta que trataría 150.000 toneladas de lixo ao ano, que se valorizaría en forma de abono orgánico (compost), materiais de reciclaxe (papel, vidro, plástico, metais, etc.) e CDR (combustíbel derivado de refugallos), deixando un “resto” non recuperábel, estimado nun 4% do total, que iría a un vertedoiro anexo.

Deixando a un lado a valoración técnica, para o BNG resulta intolerábel a actitude política do Alcalde, Antonio Pérez, agochado na primeira fila xunto ao resto do seu grupo, asistindo como simple espectador ao acto, nun patético intento de situarse a unha falsa equidistancia do proxecto cando na realidade el é o principal valedor e mentor do mesmo, como declarou aos medios logo de visitar unha planta similar que esta empresa ten en Murcia. No BNG non terminamos de entender os continuos bandazos deste alcalde que primeiro dixo si á Incineradora da Xunta do PP, logo dixo non, e agora volta a dicir si a esta planta de tratamento. Novamente imos ter que ser os veciños e veciñas de Xinzo os que o convenzamos para que mude de opinión coa nosa mobilización e rexeitamento.

Postos de traballo de ínfima cualificación

O principal e único argumento co que o PP nos quere “vender” este proxecto é o dos 200 postos de traballo directos que calculan se poderían crear nas sucesivas fases da súa implantación. Máis unha vez o modelo do PP está claro: privatización de servizos públicos e precarización das condicións de traballo. Sen entrar na análise das repercusións negativas que a presencia desta planta ocasionaría para o principal cultivo da nosa comarca, resulta chamativa a pouca estima e nula ambición que o Sr. Pérez ten para os seus conveciños ao condenalos a uns “empregos lixo” cunha cualificación ínfima que propiciará unha elevada rotación e temporalidade e, consecuentemente, salarios míseros de auténtica subsistencia. No BNG apostamos por outro futuro para a Limia, diferente ao dun PP que nos quere situar no mapa dos vertedoiros de Galiza como xa ten demostrado coa Planta de Tratamento de Refugallos da Construción. Apostamos polo impulso institucional á instalación na nosa comarca de empresas respectuosas co medio, non contaminantes, fundamentalmente empresas agro-gandeiras, que permitiran tirar un valor engadido da nosa produción creando postos de traballo estábeis, sostíbeis e cualificados.

Acto público do BNG. Outro modelo de crecemento para Xinzo é posíbel

Co obxectivo de explicar o noso posicionamento e alternativas sobre este e outros temas, o BNG convida aos veciños e veciñas a un acto público aberto o vindeiro sábado, 8 de outubro, ás 20:30h no Salón de Plenos do Concello de Xinzo, no que o noso senador e cabeza de lista por Ourense, Xosé Manuel Pérez Bouza, debullará as propostas para a Limia de cara ás vindeiras eleccións xerais do 20 de novembro.

21/06/2011

O BNG valora moi positivamente o rexeite da veciñanza de Gudín á instalación da incineradora

Amador Díaz esixe ao alcalde, Antonio Pérez, que dea a cara e ratifique agora a súa postura ao respecto da incineradora do sur na Limia.

Xinzo da Limia, 21 de xuño de 2011. O portavoz municipal do BNG de Xinzo, Amador Díaz, celebra moi positivamente a contundente negativa dos comuneiros do monte e da veciñanza de Gudín á instalación da Incineradora do Sur de Galiza na zona coñecida como “A Touza”, ao tempo que tamén esixirá na vindeira sesión plenaria a ratificación oficial do alcalde do PP, Antonio Pérez, na súa postura ao respecto da instalación dunha incineradora na Comarca da Limia.

Explicacións inmediatas pola iniciativa da Asemblea de Comuneiros

Neste sentido, Amador Díaz pedirá tamén explicacións inmediatas ao Sr. Pérez ao respecto da autoría da iniciativa de convocar esta asemblea de comuneiros do monte de Gudín para a posible instalación da Incineradora do Sur, advertíndolle que no suposto de que o promotor desta iniciativa fose tanto o alcalde como derivado da súa incoacción, e dado que estaría mentindo e incumprindo de xeito flagrante tanto o seu compromiso electoral coa veciñanza de Xinzo, así como os acordos plenarios municipais e provinciais tomados co total rexeitamento á situación desta instalación na comarca da Limia, pediremos a súa demisión irrevogábel e sen paliativos.

Malestar e alarma veciñal polo nocivo impacto ambiental da incineradora

Amador Díaz sospeita que, tanto o alcalde Antonio Pérez como o Presidente da Deputación, seguirán xogando á ruleta rusa co noso concello e comarca barallando novos emprazamentos para a incineradora dos 250 millóns de euros, como poden ser Sarreaus ou Xunqueira de Ambía, cando demostraron despois do caso de Gudín que non se pode facer unha escolla máis lesiva nun dos puntos de maior altitude do concello e que tamén ten o embalse que abastece de auga potábel a boa parte de Xinzo, o que cunha incineradora automaticamente convertería a Gudín nun auténtico reemisor de cancro e enfermidades, xa que segundo a propia O.M.S. estas instalacións duplican o risco de cancro infantil no radio inmediato de cinco quilómetros, ademais das múltiples patoloxías oncolóxicas asociadas a unha exposición prolongada ás súas emisións.

21/03/2011

Amador Díaz esíxelle ao alcalde que explique o proxecto do embarcadoiro

20110321-capa

Nunha rolda de prensa celebrada hoxe na que compareceron Amador Díaz, candidato á Alcaldía de Xinzo, Xosé Manuel Pérez, Senador, e Tereixa Paz, Deputada no Parlamento de Galiza, o BNG explicou que ven de presentar hai uns días unha iniciativa municipal para que o actual alcalde do PP, Antonio Pérez, explique no vindeiro Pleno a natureza do proxecto e do convenio asinados hai un mes co representante de Portos de Galiza, dependente da Consellaría do Mar, para a construción dun embarcadoiro deportivo no Río Limia por un importe de 200.000 euros.

Logo de varias semanas dende o insólito anuncio, que coincidiu no tempo co “globo sonda” da incineradora, non voltamos a ter noticias, nin se fixo ningunha aclaración ao respeito, malia a expectación que levantou a noticia entre os veciños e veciñas de Xinzo que agardan novas informacións que aclaren o alcance das obras e a súa viabilidade. Este silenzo fainos sospeitar que se trate dunha nova ocurrencia pre-electoral do noso alcalde coa que desviar a atención sobre os seus bandazos ao respeito da polémica incineradora que o PP proxecta instalar no sur de Galiza e sobre a cal a Xunta de Feijóo aínda non deu a coñecer a ubicación.

Novamente estamos diante dun proxecto-ocorrencia do PP, que malgasta os cartos dos galegos e galegas en obras faraónicas e inútis mentres as necesidades reais fican adiadas e esquecidas nun caixón, neste senso Amador reclamou que o que debería facer o alcalde é negociar coa Confederación Hidrográfica a limpeza do río, que precisa dunha intervención importante, realista e axeitada ás necesidades dos veciños, que garanta unha caudal mínimo todo o ano xa que, na actualidade, é un feito ben coñecido que o río baixa seco practicamente seis meses.

02/07/2010

O BNG denuncia a tardía declaración de supramunicipalidade da Planta de Refugallos e informará aos veciños do seu dereito a alegar

20100702-capa

Na reunión de onte (1 de xullo) o Consello da Xunta do PP ven de aprobar, tarde, mal e obrigado polas circunstancias, a declaración de supramunicipalidade da Planta de tratamento de refugallos da construción e demolición na comarca da Limia, pechando o círculo da complicidade coas outras dúas administracións implicadas: Deputación Provincial e Concello de Xinzo. Deste xeito o señor Feijóo avala, cun verniz de legalidade, unha actuación totalmente caciquil do Sr. Baltar executada de espaldas aos cidadáns de Xinzo coa colaboración do propio Concello, que desde o primeiro momento fixo deixación absoluta das súas responsabilidades e estivo máis preocupado de aplacar aos veciños e convencelos das “bondades” da instalación que de escoitalos e defender os seus dereitos agredidos.

O anuncio desta declaración inicial arranca un proceso viciado de orixe, porque a planta xa se está a construír, no que os veciños aínda deberán ser escoitados xa que, tanto a Lei 10/1995, de ordenación do territorio de Galiza coma o Decreto 80/2000, polo que se regulan os plans e proxectos sectoriais de incidencia supramunicipal son moi claros na tramitación requerida e, agora ábrense os prazos legais nos que desde o BNG animaremos aos veciños para que aleguen e, cando menos, quede constancia do seu rexeitamento.

Unha vez máis rexeitamos a afirmación de que o emprazamento foi elixido con “criterios técnicos” xa que só hai que ver a localización para darse conta de que é caprichosa e responde a intereses inconfesábeis do propio PP: lonxe das principais vías de comunicación, só accesíbel por unha estrada provincial de pésimo firme que atravesa varios núcleos urbanos e no alto dun monte que obriga a facer un grande movemento de terras provocando un impacto ambiental infinitamente máis grande do que pretende solucionar.

No BNG lamentamos que Antonio Pérez Rodríguez, actual Concelleiro de Medio Ambiente e posíbel candidato “popular” nas vindeiras eleccións, estree a súa recén adquirida condición enganando ás veciñas e veciños de Morgade, desoíndo as advertencias do noso Grupo e actuando ás ordes de escuros intereses alleos en lugar de defender os dereitos lexítimos dos cidadáns aos que aspira a solicitarlle o voto.

Referencias:

04/06/2010

O BNG solicita a paralización inmediata das obras da Planta de refugallos e que os culpábeis da desfeita asuman as súas responsabilidades políticas

20100604-capa

Nos pasados días confirmáronse en todos os seus extremos as sospeitas que viñamos denunciando desde hai un mes ao respeito da Planta de tratamento de refugallos da construción e demolición na comarca da Limia, promovida pola Deputación Provincial e financiada (651 mil euros) mediante axudas da Unión Europea, xa que finalmente a propia Deputación recoñece que esta obra é totalmente ilegal: non se solicitou licenza ao Concello e non se realizou ningún dos trámites que prevé o Decreto 80/2000, da Xunta de Galiza, polo que se regulan os plans e proxectos sectoriais de incidencia supramunicipal. O anuncio de que xa hai un informe favorábel parécenos unha burla máis que unha xustificación xa que o citado decreto é moi claro e taxativo na tramitación requerida e o feito de pasalo por alto deixa aos veciños na máis absoluta indefensión ao non poder alegar nada en tempo e forma.

Rexeitamos a afirmación de que o emprazamento foi elixido con “criterios unicamente técnicos” xa que só hai que ver a localización para darse conta de que non foi escollida por ningún técnico: lonxe das principais vías de comunicación, só accesíbel por unha estrada provincial de pésimo firme e sinuoso trazado que, ademais, atravesa varios núcleos urbanos e no alto dun monte que obriga a facer un grande movemento de terras para acondicionar o solar, provocando un impacto ambiental que deixa en papel mollado o anuncio de rexeneración da zona xa que estamos falando dunha concesión a quince anos, por non entrar a analizar a máis que discutíbel viabilidade económico-financeira de todo o proxecto.

En vista de todas estas irregularidades o BNG solicitou a paralización inmediata das obras e a reposición dos terreos ao seu estado anterior, e que os responsábeis da desfeita por acción: Sr. Baltar, e por omisión: Sr. Vila, Alcalde de Xinzo e Sr. Pérez, Concelleiro de Medio Ambiente, asuman as responsabilidades políticas oportunas, que deberían comezar pola dimisión ou cese inmediato do citado Concelleiro, porque en todo este tempo desoíu as advertencias continuas lanzadas polo BNG e, sendo deputado provincial, non amosou o menor interese nin se preocupou de defender aos veciños afectados, converténdose nunha simple correa de transmisión das ordes que lle viñan desde arriba.

Finalmente denunciar que o Sr. Baltar non ten reparos en aplicar a “doutrina Feijóo” que afirma que “o importante son os cartos”, aínda que se malgasten en obras inútiles, saltándose olimpicamente a lexislación vixente e pisoteando os dereitos dos cidadáns.

Referencias:

Páxinas: 1 2 3 4 Seguinte

bng
2003-2013, Grupo Local do Bloque Nacionalista Galego de Xinzo da Limia
R/ Río Arnoia, 14 - Local 18 (Multicentro - 1ªandar) | 32630 Xinzo da Limia - Ourense (Galiza, UE) | Tlf/Fax: 988461360
www.bng-xinzo.org | @bngxinzo | info@bng-xinzo.org

Cretos | Privacidade e seguridade | Condicións de uso

Todo o contido desta web está baixo unha licenza Creative Commons Recoñecemento 3.0 se non se indica o contrario

208 queries - 0,201 segundos | Powered by WordPress