#ConstruíndoFUTURO, Asemblea Aberta. Xinzo, 10 de outubro, 20:30h, Casa da Cultura. Contamos contigo?

bng.xinzodalimia

18/07/2012

O BNG esixe ó Alcalde de Xinzo que desautorice unha concesión mineira proxectada nas concentracións parcelarias anexas ó río Faramontaos

Para o Grupo Municipal do BNG estamos diante dunha cuestión de extrema gravidade que esixe a máxima prioridade, especial dedicación, rigor e interese por parte dos responsábeis municipais ao afectar directamente á un piar básico da economía dos nosos veciños como é o agro, comprometendo directamente a viabilidade de 400 Has e indirectamente a totalidade das veigas de terra útil concentrada das parroquias de San Pedro, Laroá, Fiestras, Rebordechá, Paredes, Moreiras, Faramontaos e Seoane, dada a agresividade e forte impacto do proxecto.

É por este motivo que o BNG ven de celebrar coa presenza da deputada Tareixa Paz unha serie de xuntanzas informativas veciñais nestes núcleos rurais de Xinzo alertando das terribles consecuencias deste proxecto mineiro para o agro, a economía e o medo ambiente da zona. Por outra banda, tamén se está a informar a veciñanza que asemade das alegacións, mocións presentadas ou dos acordos tomados polos distintos grupos políticos no Pleno Extraordinario que se celebrará o vindeiro xoves ao respecto, e ao abeiro da LEI 3/2008 do 23 de maio de ordenación da minería da Galiza, Título IV Dereitos Mineiros, Capítulo I Procedemento de outorgamento dos dereitos mineiros, Artigo 22 Informe Municipal preceptivo, o BNG de Xinzo da Limia esixe o Alcalde-Presidente do Concello que proceda a redacción dos informes técnicos municipais preceptivos que contempla a devandita Lei, informes DESFAVORABLES que detallen e xustifiquen a nefasta incidencia e forte impacto negativo que o devandito proxecto Faramontaos 5089 supón tanto no eido económico, ambiental, social como agropecuario da zona E ASÍ DESAUTORICE taxativamente este procedemento de outorgamento de dereito mineiro, para o que dispón dun prazo de dous meses.

Así mesmo e ante a pasividade manifesta do PP que ceibou todo o seu rexeite na simple sinatura de alegacións, o BNG a través da súa deputada Tareixa Paz porá en marcha nesta mesma semana no Parlamento da Galiza unha serie de iniciativas encamiñadas a que as Consellerías do Medio Rural e do Medio Ambiente rexeiten de xeito frontal tamén este procedemento administrativo cos seus preceptivos informes técnicos desfavorables.

08/03/2012

Pleno ordinario 8-3-2012

Hoxe, quinta-feira (xoves), 8 de marzo (Día da Muller Traballadora), ás 11:00h celébrase o pleno ordinario segundo a orde do día que se acompaña.

Destacamos a aprobación, a iniciativa do BNG, dunha moción instando á execución do regadío así como a adopción de diferentes medidas encamiñadas á mellora e potenciación do sector da pataca.

18/01/2012

O BNG reclama medidas estruturais para darlle estabilidade ao sector agro-gandeiro da Limia

A produción de pataca na Limia é unha actividade estratéxica e fundamental, non só para esta comarca, senón tamén para o conxunto da provincia de Ourense. Neste momento está a sufrir unha situación de crise, por iso, desde o Grupo Municipal do BNG, cremos que é imprescindíbel que exista un apoio e aposta das administracións públicas e poderes políticos para paliar a súa situación estrutural, e non só as situacións de crise que ciclicamente se veñen producindo, sendo preciso, ao noso entender, mudar o sentido da política que o actual goberno da Xunta está a acometer.

O da pataca é un sector que sempre se caracterizou pola inestabilidade dos prezos que perciben os labregos e labregas, anos nos que os prezos se equilibran cos gastos e a remuneración do traballo, altérnanse con campañas, como a actual, nas que os ingresos das explotacións non chegan nin para cubrir os custos de produción. Por outra banda, a falla dunha regulación das marxes comerciais crea unha concentración do valor económico da pataca na distribución fronte á produción e elaboración. Neste senso, defendemos que a Administración debería acometer e apostar por medidas de apoio aos labregos e labregas para a comercialización directa e mesmo apoiar á industria de transformación propia, ao igual que fixo o BNG no Goberno Galego en setembro de 2008, cando asinou o contrato homologado no marco da Mesa da Pataca, contrato que tiña como finalidade regular os prezos e que podía axudar ao sector de ter tido continuidade en 2009, medida que acompasou con outras como o Plan de melloras e axudas a novas incorporacións á actividade agraria, que propiciou a incorporación de moitos mozos e mozas ao sector agro-gandeiro contribuíndo a posibilitar a substitución xeracional e atenuar o despoboamento das áreas rurais.

Na actualidade existen contratos privados entre os almacenistas e os produtores e produtoras os cales non ofrecen garantías de ningún tipo para estes últimos, xa que dependen de como vaia a campaña. A industria aplica descontos ou fai calibrados das patacas en función dos seus intereses. No sector da pataca é evidente a dinámica de baixada de prezos, así como as tentativas das grandes empresas do sector para controlar totalmente o mercado, marcando prezos por debaixo dos custes de produción.

Atopámonos diante dun sector que carece de Organización Común de Mercado (OCM), polo que non existe ningún tipo de regulamento nin tampouco axudas de apoio ao mesmo. Faise pois indispensábel adoptar medidas correctoras, tanto do sector como dos mercados, para garantir unhas rendas dignas aos labregos e labregas, e para frear a especulación e as oscilacións de prezos ás que se ve sometido.

05/10/2011

O BNG lamenta a teima do Alcalde de Xinzo en querer converter á Limia no vertedoiro do sur de Galiza

20111005-capa

Amador Díaz denuncia a actitude covarde do alcalde do PP, Antonio Pérez, que non dá a cara e delega nun técnico alleo ao Concello a explicación do proxecto.

Xinzo da Limia, 5 de outubro de 2011. No día de onte, auspiciada polo grupo de goberno do PP no Concello de Xinzo co seu Alcalde á cabeza, Antonio Pérez, celebrouse na Casa da Cultura unha xuntanza para a “presentación” do proxecto dunha Planta de Tratamento de Refugallos promovida por unha firma murciana. No decorrer da mesma un técnico en representación da citada empresa degrañou as “virtudes” do proceso de “valorización” aplicado ao lixo, nun intento superfluo de convencer aos presentes da súa comenencia pois os “convidados”, na súa maioría seguidores populares, xa estaban convencidos de antemán e non precisaban de moitos máis adobíos técnicos que nin entenderon nin lles interesaban. Este proxecto resúmese nos seguintes puntos chave: un investimento de 50 millóns de euros, unhas instalacións de 60 mil metros cadrados e 200 postos de traballo directos nunha planta que trataría 150.000 toneladas de lixo ao ano, que se valorizaría en forma de abono orgánico (compost), materiais de reciclaxe (papel, vidro, plástico, metais, etc.) e CDR (combustíbel derivado de refugallos), deixando un “resto” non recuperábel, estimado nun 4% do total, que iría a un vertedoiro anexo.

Deixando a un lado a valoración técnica, para o BNG resulta intolerábel a actitude política do Alcalde, Antonio Pérez, agochado na primeira fila xunto ao resto do seu grupo, asistindo como simple espectador ao acto, nun patético intento de situarse a unha falsa equidistancia do proxecto cando na realidade el é o principal valedor e mentor do mesmo, como declarou aos medios logo de visitar unha planta similar que esta empresa ten en Murcia. No BNG non terminamos de entender os continuos bandazos deste alcalde que primeiro dixo si á Incineradora da Xunta do PP, logo dixo non, e agora volta a dicir si a esta planta de tratamento. Novamente imos ter que ser os veciños e veciñas de Xinzo os que o convenzamos para que mude de opinión coa nosa mobilización e rexeitamento.

Postos de traballo de ínfima cualificación

O principal e único argumento co que o PP nos quere “vender” este proxecto é o dos 200 postos de traballo directos que calculan se poderían crear nas sucesivas fases da súa implantación. Máis unha vez o modelo do PP está claro: privatización de servizos públicos e precarización das condicións de traballo. Sen entrar na análise das repercusións negativas que a presencia desta planta ocasionaría para o principal cultivo da nosa comarca, resulta chamativa a pouca estima e nula ambición que o Sr. Pérez ten para os seus conveciños ao condenalos a uns “empregos lixo” cunha cualificación ínfima que propiciará unha elevada rotación e temporalidade e, consecuentemente, salarios míseros de auténtica subsistencia. No BNG apostamos por outro futuro para a Limia, diferente ao dun PP que nos quere situar no mapa dos vertedoiros de Galiza como xa ten demostrado coa Planta de Tratamento de Refugallos da Construción. Apostamos polo impulso institucional á instalación na nosa comarca de empresas respectuosas co medio, non contaminantes, fundamentalmente empresas agro-gandeiras, que permitiran tirar un valor engadido da nosa produción creando postos de traballo estábeis, sostíbeis e cualificados.

Acto público do BNG. Outro modelo de crecemento para Xinzo é posíbel

Co obxectivo de explicar o noso posicionamento e alternativas sobre este e outros temas, o BNG convida aos veciños e veciñas a un acto público aberto o vindeiro sábado, 8 de outubro, ás 20:30h no Salón de Plenos do Concello de Xinzo, no que o noso senador e cabeza de lista por Ourense, Xosé Manuel Pérez Bouza, debullará as propostas para a Limia de cara ás vindeiras eleccións xerais do 20 de novembro.

03/02/2011

O BNG advirte que a instalación dunha planta incineradora en Xinzo tería un grave impacto no sector da pataca

Amador Díaz explicou que o BNG vai iniciar unha campaña contra a ubicación desta planta na comarca da Limia, e presentará iniciativas nos concellos da comarca.

Ourense, 3 de febreiro de 2011. O senador do BNG e tamén responsábel da comarca de A Limia, Xosé Manuel Pérez Bouza, e o portavoz municipal no concello de Xinzo, Amador Díaz Penín, deixaron claro esta mañá nunha rolda de prensa a total oposición do BNG á que se instale en Xinzo unha planta incineradora de residuos sólidos. Pérez Bouza afirmou que “nos opoñemos á ubicación dunha planta destas características no polígono de Xinzo”.

Ninguén mercaría patacas producidas perto dunha planta incineradora

En primeiro lugar, terá un impacto moi negativo no principal sector económico da comarca que é o sector agrario, en concreto, a produción da pataca. Ninguén querería mercar patacas de A Limia que se cultivan ao redor unha planta incineradora, altamente contaminante”. Neste sentido, remarcou que a tendencia actual é a de mercar produtos ecolóxicos, “ninguén mercaría patacas producidas ao lado dunha planta de residuos”.

En segundo lugar, o senado do BNG considerou un “despropósito que a Xunta actual faga o mesmo que fixo Fraga no seu día coa planta de Cerceda. O argumento para xustificala é que é para tratar o lixo do sur de Galiza. Hai que lembrar que Ourense só produce o 2% do lixo, cando a meirande parte se produce en Vigo e na súa área metropolitana. Así que non ten sentido ubicar esta planta en Xinzo”.

Por último, Pérez Bouza deixou claro que o BNG non comparte ese modelo de tratamento de residuos sólidos, “xa que nós apostamos pola reciclaxe e a compostaxe de lixo”. Acusou ao PP de “tratar de converter Á Limia no vertedoiro de Galiza. Non entendemos a súa teima xa que en menos dun ano decidiu a instalación dunha planta de residuos da construción, e agora ten na carteira outra”. Demandou a Feijoo que antes da celebración das eleccións municipais aclare se vai ubicar a planta de residuos en Xinzo.

A Limia non debe converterse “no vertedoiro de Galiza”

O senador nacionalista afirmou que “o futuro da Limia non pasa polo de ser un vertedoiro, o seu futuro debe ir ligado a proxectos relacionados coa xeración de riqueza sen destruir o que temos”. Así, referiuse á necesidade de pechar o ciclo produtivo da pataca.

O portavoz municipal do BNG en Xinzo, Amador Díaz, explicou que o BNG vai iniciar unha campaña en contra das pretensións da Xunta, e “levaremos aos plenos dos concellos de A Limia, sobre todo ao de Xinzo, iniciativas para un pronunciamento en contra”. Ademáis, anunciou que se convocarán xuntanzas informativas cos veciños e recollida de sinaturas.

05/10/2010

O PP impide as obras de modernización do regadío da Limia e a súa reactivación económica como reclamaba o BNG

O BNG, a través da portavoz de agricultura, Tereixa Paz, defendeu hoxe en sede parlamentar, unha proposición non de lei para a modernización de regadíos da Limia e a posible afectación da declaración de Zona de Especial Protección de Aves (ZEPA) ao proxecto, iniciativa que  foi rexeitada polo Partido Popular.

A falta de partidas  nos orzamentos do PP frea as obras de regadío

Na súa intervención, a deputada nacionalista salientou o “considerable retraso” na verificación dos trámites  deste proxecto e explicou que as obras para iniciar a modernización dos regadíos da Limia tropezaron, ao longo do tempo, con obstáculos como: o desacordo dos regantes na súa cuantía, por consideralas  desmesuradas, a falta de consignación nos orzamentos da Xunta para o ano 2010, ausencia de consignación nos orzamentos do Estado para o 2011 ou o retraso do Executivo galego na sinatura do convenio con SEIASA del Norte, empresa competente na execución destas infraestruturas.

Para Paz, ademais dos motivos que están a frear as obras, hai que sumar a aprobación do Decreto polo que se establece a Zona de Especial Protección de Aves (ZEPA) na Limia que está a crear grande incerteza nas comunidades de regantes.

O Goberno do  PP mantén unha actitude inmobilista

A parlamentaria nacionalista reclamou un “cambio de actitude” do Goberno galego, por ser –na súa opinión- “o maior valedor das comunidades de regantes ante a empresa pública SEIASA que debe dar resposta ás demandas e necesidades dos produtores”.

Paz reiterou a importancia da comarca da Limia na produción de pataca e cereal, como elemento fundamental para o seu desenvolvemento económico e asegurou que “a Xunta e o Estado adían as obras para o regadío nesta comarca agrícola, converténdoa nunha das primeiras vítimas da austeridade”.

Afección da ZEPA no proxecto de modernización

Neste sentido preguntou como afecta a declaración de ZEPA á execución das obras de modernización d0 regadí0 da Limia e como se vai garantir ás comunidades de regantes que non existe ningún obstáculo para a modernización do regadío nas comunidades de Lamas Ganade, Alta Limia, Corno do Monte e San Lourenzo de Sabucedo.

Pola súa parte a portavoz do g.p do Partido Popular, Yolanda Díaz Lugilde, respondeu que existe un plan de modernización de regadíos 2007-2013  e que na actualidade, xa se ten avanzado na sinatura do convenio marco con SEIASA pero para a deputada do BNG, “o PP non aportar datos sobre o devandito avance”  e culpabiliza  ao Goberno do Estado de entorpecer o proxecto.

O financiamento das obras é compartido

Paz retrucou á portavoz do PP que “o financiamento, segundo o convenio marco de regadíos, correspóndelle o 10% aos regantes,  o 41% ao Estado, a través de SEIASA del Norte, o 27% dos  fondos FEADER e o 22% de fondos propios da Xunta” e reiterou que nos orzamentos do ano 2010 non existía a consignación correspondente ao 22 % que ten que achegar a Xunta, polo tanto -dixo- “non segan botándolle a culpa aos demais para zafarse dos problemas”.

Finalmente, Tereixa Paz  pediulle ao Partido Popular que abandonara a súa “actitude de pasotismo e neglixencia” para poder iniciar as obras  partindo de  dúas premisas: a Xunta debe asinar, sen dilación, o convenio marco e encetar as obras neste período de sesións e garantir que a declaración de ZEPA non implique ningunha nova tramitación administrativa nin impedimento para executar os proxectos de regadío tal e como foron concibidos.

Referencias:

25/03/2010

O BNG foi o único grupo que presentou un texto que expresamente defendía a actividade agrogandeira na ZEPA da Limia

O Bloque Nacionalista Galego quere realizar as seguintes aclaracións respecto da aprobación da modificación da lei de ordenación urbanística e de protección do medio rural de Galiza en relación coa ZEPA da Limia:

PRIMEIRO

O Grupo Parlamentar do Bloque Nacionalista Galego foi o único que no tramo final da tramitación do proxecto de lei, no momento do seu debate en Pleno presentou, en base a unha emenda previa do propio grupo referida aos usos agrogandeiros, unha proposta de transacción que puidese resolver os obstáculos que desde a perspectiva da lexislación urbanística puidesen empecer a actividade agraria e gandeira nos terreos afectados pola declaración de ZEPA. A proposta de transacción tiña o seguinte tenor literal:

“Engadir un novo punto 4 no artigo 39 (que é o que regula os usos no solo rústico de especial protección de espazos naturais) coa seguinte redacción: Nos solos incluídos na delimitación da Zona de Especial Protección de Aves da Limia ademais dos anteriores, estarán permitidos os usos previstos no artigo 33 (que regula os usos do solo rústico) alínea 2. (usos construtivos), parágrafos a) (construcións e instalacións agrícolas…) e b) ( construcións e instalacións destinadas á gandaría…) ademais das infraestruturas necesarias para o seu desenvolvemento.”

Esta proposta de transacción non puido ser aprobada por non ser aceptada polos outros grupos parlamentares e non ter, obviamente, o Bloque Nacionalista Galego a maioría suficiente para facelo.

SEGUNDO

O Grupo do PP formulou unha posíbel transacción con outro grupo, que non era o do Bloque Nacionalista Galego, ao carecer o PP de emendas propias, e que implicaba que ese outro grupo aceitase a retirada da súa emenda para poder aceptar a proposta do PP, ao cal non se prestou dito grupo parlamentar. Non houbo, polo tanto, ningún tipo de obstaculización nin veto por parte do BNG a quen a súa representación, que é de só doce deputados/as, por outra parte, non lle da tal capacidade de impedir maiorías parlamentares.

En calquera caso hai que sinalar que a proposta do PP non facía ningunha mención nin expresa nin remota á ZEPA da Limia nin producía ningunha modificación nos usos permitidos no solo rústico, limitándose a excluír os terreos incluídos na Rede Natura da consideración de solo rústico de protección de espazos naturais o cal podería permitir que nun espazo natural protexido se constrúa unha urbanización e aínda así non resolver a compatibilidade de usos agrogandeiros na Limia.

TERCEIRO

Desde o Bloque Nacionalista Galego expresamos unha vez máis que a nosa posición en relación coa ZEPA da Limia se mantén invariábel no sentido de que en primeiro termo se debe garantir o desenvolvemento e competitividade dos usos agrarios e gandeiros actuais e futuros desta comarca e que non foi a nosa organización que decidiu nin permitiu que se aprobase o Decreto de ZEPA sen adoptar previamente as medidas que garantisen o cumprimento desa premisa.

Finalmente consideramos que só desde o descoñecemento e a ignorancia máis absoluta dos feitos ou, o que sería peor, coa clara intención de difamar á nosa organización política se poden realizar imputacións tan maniqueas, terxiversadas e malintencionadas como as realizadas contra nós, posto que foi o único grupo que puxo encima da mesa un texto que contiña unha alusión concreta e explícita para que na ZEPA da Limia non existise ningún tipo de impedimento para a actividade agraria e gandeira.

Referencias:

ACTUALIZACIÓN (27-03-2010)

En resposta ás afirmacións de Unións Agrarias que acusaban ao BNG de incoherente e de abandoar aos agricultores da Limia, hoxe, representantes de catro comunidades de regantes, da Asociación de Productores de Pataca e do sector gandeiro de Xinzo aseguran nun comunicado que non se sinten «representados pola dita organización sindical» e poñen en dúbida a súa representatividade e lexitimidade para negociar o Plan de Usos da Zepa.

08/03/2010

Guillerme Vázquez exixe a avaliación dos danos do temporal na Limia e que se poñan en marcha axudas para os agricultores da comarca

20100308-capa

O portavoz nacional do BNG, Guillerme Vázquez, realizou esta mañá unha visita ás zonas afectadas polo temporal na comarca da Limia, onde fixo un percorrido para comprobar a situación das veigas de cereal asolagadas en Piñeira Seca (Xinzo de Limia) e dos danos causados en naves agrícolas. “Debemos de esixir con urxencia, en primeiro termo á Xunta de Galiza, Deputación, concellos e Goberno central que, cando menos, se deixen caer pola zona para avaliar os danos do temporal e poñan en marcha axudas para que esta xente poida saír da situación na que se atopa”, sinalou Guillerme Vázquez.

Guillerme Vázquez comprobou in situ os “innumerábeis danos en bens privados” e afirmou que “resulta incomprensíbel e lamentábel que ás distintas administracións da Xunta de Galiza nin se lles ve nin se lles espera”. “Estamos diante da nave dun agricultor que ten afectadas as súas instalacións e os seus propietarios teñen que estar durmindo nelas, facendo quendas, para protexer os seus bens”, sinalou.

O portavoz nacional realizou esta visita acompañado do voceiro do BNG en Xinzo, Amador Díaz, da deputada Tereixa Paz, do senador Xosé Manuel Pérez Bouza e do alcalde de Allariz, Francisco García, entre outros, ademais de agricultores e membros das comunidades de regantes.

“É lamentábel que nin Concello, nin Xunta, nin Estado se preocupen pola situación dunhas persoas que teñen que verse obrigadas a defender os seus propios bens porque a autoridade non está dispoñíbel”, dixo o portavoz nacional. Guillerme Vázquez engadiu que “estamos nunha comarca na que os prezos derivados da pataca están por debaixo dos prezos de produción, con toneladas sen vender a estas alturas, e agora vemos como unhas inundacións que botaron abaixo a colleita de cereal e dificultan as plantacións para futuras colleitas” van agravar a situación do sector agrario e o desenvolvemento económico desta comarca.

As administracións competentes “a estas alturas non avaliaron os danos, non pasaron pola zona e non puxeron en marcha un plan de axudas para que os agricultores poidan saír desta situación dende o punto de vista do BNG é intolerábel que vivan fóra da realidade e dos problemas da xente”.

“A nós correspóndenos facer presión política para que isto non siga así e presentaremos iniciativas nos concellos, no Parlamento galego, no Congreso e no Senado e en todos aqueles órganos de representación onde estamos”, afirmou.

Referencias:

Páxinas: 1 2 3 Seguinte

bng
2003-2013, Grupo Local do Bloque Nacionalista Galego de Xinzo da Limia
R/ Río Arnoia, 14 - Local 18 (Multicentro - 1ªandar) | 32630 Xinzo da Limia - Ourense (Galiza, UE) | Tlf/Fax: 988461360
www.bng-xinzo.org | @bngxinzo | info@bng-xinzo.org

Cretos | Privacidade e seguridade | Condicións de uso

Todo o contido desta web está baixo unha licenza Creative Commons Recoñecemento 3.0 se non se indica o contrario

208 queries - 0,194 segundos | Powered by WordPress