#ConstruíndoFUTURO, Asemblea Aberta. Xinzo, 10 de outubro, 20:30h, Casa da Cultura. Contamos contigo?

bng.xinzodalimia

25/11/2013

A oposición convoca un pleno para que o alcalde explique as acusacións de “desviación de poder e indicios de prevaricación”

SAMSUNG

Todos os grupos da oposición forzan ao alcalde, Antonio Pérez, a que explique as sentenzas condenatorias polas contratacións realizadas no 2012.

Xinzo da Limia, 25 de novembro de 2013. Os grupos políticos que integran a oposición no Concello de Xinzo (BNG, PSdeG-PSOE, APGA, AIDAL e ANOVA) rexistraron esta mañá unha petición conxunta solicitando a celebración dun pleno extraordinario para que o alcalde, Antonio Pérez, dea conta e explique a todas as veciñas e veciños de Xinzo a súa situación xurídico-procesal logo das sentencias emitidas polos Xulgados do Contencioso-Administrativo nº1 e nº2 de Ourense a raíz das denuncias da Avogacía do Estado polas contratacións de persoal laboral temporal feitas polo Sr. Pérez, ignorando os informes preceptivos de Secretaría e Intervención, sen os correspondentes procesos de selección e contravindo o RDL 20/2011.

Nestas sentenzas, coñecidas os pasados días 12 e 13 de novembro, os maxistrados proceden á anulación das contratacións e cualifican a actuación do Sr. Pérez como de “desviación de poder e indicios de prevaricación”, “conduta irregular e constante realizada con plena consciencia da súa ilicitude por manter en nómina a determinadas persoas con contratos temporais, pese aos reparos do secretario e do interventor” e de “incumprimento groseiro e consciente por parte do mandatario que podería ser constitutivo dun delito de prevaricación”. Ao tempo, ordenan (unha vez a sentenza sexa firme) a remisión do expediente ao Xulgado de Primeira Instancia de Xinzo para que proceda a investigar as responsabilidades penais que se puideran derivar por parte de Sr. Pérez.

Dada a gravidade das acusacións e as abondosas testemuñas e documentación administrativa que as avalan, a partires deste intre a situación do Sr. Pérez só pode evolucionar a peor, polo que a única saída lóxica pasa pola súa dimisión inmediata e irrevogábel. O Concello de Xinzo non pode estar gobernado por unha persoa que incumpre sistemática e conscientemente a normativa en materia de contratación e os veciños e veciñas non se poden permitir un alcalde e un goberno municipal á deriva e baixo sospeita permanente.

06/03/2013

O BNG denuncia as arbitrariedades do PP na xestión da política de persoal e insta á Fiscalía a poñerlles fin

20130306-capa

O BNG de Xinzo fica a disposición das autoridades administrativas e xudiciais para aportar toda a documentación que obra no noso poder ao respecto das irregularidades en materia de persoal practicadas polo alcalde.

Xinzo da Limia, 6 de marzo de 2013. Historicamente a política de contratación de persoal dos gobernos do PP no Concello de Xinzo estivo orientada ao pago de favores máis que á xestión acaida dos servizos e recursos municipais, só así se entende o continuo medre de efectivos (de 93 en 2006 a 146 en 2012) ata chegarmos á situación actual na que o peso da partida de persoal acada un 60% do gasto ordinario anual.

Non obstante, para contextualizarmos a situación dos últimos tempos, xa baixo a xestión do actual alcalde, Antonio Pérez Rodríguez, non debemos perder de vista dous fitos importantes na súa aínda corta traxectoria política: un, a loita intestina polo control do partido a nivel local, na que contou co apoio entusiasta e decidido do Sr. Baltar, e o silenzo cómplice do seu predecesor, Isaac Vila, que lle cedeu a alcaldía a finais do 2010 a cambio dunhas contraprestacións que logo non se verificaron, e dous, a celebración das eleccións municipais de maio de 2011, nas que o Sr. Pérez non escatimou medios, procedementos nin promesas coa fin de conquistar o bastón de mando municipal.

Nestes dous anos longos de mandato do Sr. Pérez sucedéronse as actuacións desafortunadas en todos os eidos, mais sen dúbida o récord de despropósitos acadouse na xestión do persoal, cunha serie de medidas e decisións claramente orientadas a construír e consolidar o seu propio aparato caciquil a imaxe e semellanza dos seus mentores provinciais:

  • Provisión e posterior adxudicación da praza de letrada á filla de Prado Verdeal (após o escándalo acaecido cando toda a familia Verdeal apareceu censada na casa dunha veciña de Xinzo coa que non tiñan relación) mediante un concurso-oposición “á medida” cun tribunal político composto por unha recua de enchufados na Deputación, todos eles parentes de alcaldes ou ex-alcaldes do PP, capitaneados por Gerardo Pumar Pumar, quen fora durante anos secretario provincial da Delegación da Consellería de Medio Ambiente cando Agustín Prado Verdeal era o delegado.
  • Contratación sistemática de apoderados e interventores do PP como pago aos servizos prestados, ata unha ducia teñen entrado a traballar para o Concello nestes meses mediante contratos temporais, contravindo as directrices do goberno do Estado (Real Decreto-Lei 20/2011) e do propio Plan de Saneamento aprobado no 2009, que obrigan taxativamente á conxelación da oferta de emprego.
  • Contratación e prórroga de contratos a familiares e parentes do propio alcalde ou dos seus concelleiros.
  • Recorte de dereitos e salarios aos traballadores e traballadoras baixo a ameaza dun ERE, suspensión de artigos do actual convenio colectivo e denuncia do mesmo como paso previo para a negociación dun novo.
  • Aprobación a finais de 2012 dunhas inútiles e rimbombantes “Propostas de actuación prioritarias e inmediatas para a racionalización administrativa e regulación dos RR.HH municipais”, consistentes nunha “Proposta de estrutura administrativa e de postos municipal”, pseudo-RPT destinada a consolidar a estrutura existente, e unhas “Instrucións para a regularización da incorporación de persoal temporal”, documento co que o alcalde pretende dar un verniz procedemental ás súas contratacións e, ao tempo, derivar a responsabilidade á hora de realizalas nun órgano municipal mancomunado.
  • Nomeamento dun xubilado afín ao PP, Isidoro Sánchez Blanco, como persoal eventual de confianza e de asesoramento especial da Alcaldía sen percepción de retribucións, posto absolutamente inútil e prescindíbel concibido co único obxectivo de inserir na cadea de mando unha figura de control político dos traballadores e traballadoras municipais.
  • A derradeira gota, por agora, veu coa contratación o pasado 31 de decembro do nº12 do PP nas pasadas municipais, José Antonio Balbuena Iglesias, para a praza de peón de mantemento da canceira municipal.

Todas estas irregularidades e arbitrariedades, que veñen sendo denunciadas sistematicamente polo BNG a través dos cauces institucionais dentro dos órganos de representación política, ficaron plasmadas en sendas denuncias interpostas pola CIG, sindicato maioritario no Concello, diante da Subdelegación do Goberno, en novembro de 2012, e da Fiscalía de Ourense, en xaneiro deste ano. Así, chegados a esta situación, dende o BNG de Xinzo poñémonos a disposición das autoridades administrativas e xudiciais para aportar toda a documentación que obra no noso poder ao respecto, ao tempo que reclamamos que os diferentes órganos xurisdicionais poñan dunha vez coto a estás prácticas sistemáticas e obriguen ao alcalde a mudar de actitude e situar os intereses dos veciños e veciñas de Xinzo por riba dos seus particulares e do seu partido.

28/02/2013

Pleno ordinario 28-2-2013

Hoxe, quinta-feira (xoves), 28 de febreiro, ás 11:00h celebrouse o pleno ordinario segundo a orde do día que se acompaña.

Como tema máis reseñábel, e único con contido real na orde do día, destacamos a aprobación da redución de salario do 15,11% do persoal laboral do Concello en cumprimento do Plan de Axuste aprobado polo PP en marzo do ano pasado e do acordo plenario de 5.9.2012. Neste punto denunciamos a incoherente e errática política de persoal do grupo de goberno así como o seu nulo rigor técnico ao asinar unha proposta de redución inviábel legalmente, co cal ao final reducirase a todos os traballadores ese 15%, incluíndo as cotizacións á Seguridade Social.

No tempo das moción de urxencia aprobouse por unanimidade unha proposta do BNG na que se insta á Xunta de Galiza a declarar a Limia como Zona de Actuación Agraria Prioritaria, ao abeiro da Lei 6/2011, do 13 de outubro, de mobilidade de terras, o que dotará á nosa comarca dunha maior protección fronte a proxectos como o da mina de feldespatos.

 Filed under: Grupo Municipal,Mocións
27/12/2012

Pleno ordinario 27-12-2012

Hoxe, quinta-feira (xoves), 27 de decembro, ás 11:00h celébrase o derradeiro pleno ordinario do ano segundo a orde do día que se acompaña.

Como tema máis reseñábel a tratar destacamos:

* Aprobación das Propostas de actuación prioritarias e inmediatas para a racionalización administrativa e regulación dos RRHH municipais.
* Aprobación liquidación da Mancomunidade de Concellos da Limia.
* Adhesión ó Convenio-Marco da Excmª Deputación Provincial relativo á rede provincial de canceiras.

10/08/2012

O BNG denuncia o escándalo que supón a adxudicación “a dedo” da praza de avogada do Concello á filla de Prado Verdeal

Darlle o cualificativo de “técnico” a unha pantomima de tribunal composto por unha recua de enchufados na Deputación resulta un insulto á intelixencia dos veciños de Xinzo.

Xinzo da Limia, 10 de agosto de 2012. No BOP nº181, do 8 de agosto, aparece a resolución da adxudicación da praza de “letrada do concello” a Dna. María del Carmen Prado López. Chegamos así ao desenlace dun proceso que arrincou en vésperas das eleccións municipais de maio de 2011 cando o BNG denunciou a fraude e manipulación do censo electoral e que acadou a súa apoteose no caso do ex-delegado de Medio Ambiente, Agustín Prado Verdeal (pai da nova letrada), quen “apareceu” censado con outros catro familiares na casa dun veciño de Xinzo co que non tiña relación ningunha.

Estamos diante dun proceso escandaloso e que, unha vez máis, confirma a caradura e falla absoluta de vergoña e de escrúpulos de todos os implicados. Un concurso-oposición amañado dende o principio á medida da “gañadora” cun “tribunal político” composto por unha recua de enchufados na Deputación, todos eles parentes en diversos grados de alcaldes ou ex-alcaldes do PP, comandados polo xefe territorial da Consellería de Cultura e Turismo. Darlle o cualificativo de “técnico” a esta pantomima de tribunal resulta un insulto á intelixencia do resto de candidatos, que de boa fe se teñen presentado ao concurso, e a todas as veciñas e veciños de Xinzo.

Resulta paradoxal que o Sr. Pérez, en pleno proceso de recorte de salarios e dereitos aos traballadores e traballadoras do Concello, non teña mellor ocorrencia que engadir unha nova lousa en forma de praza de funcionario ao xa avultado capítulo de gastos de persoal, incumprindo descaradamente os compromisos adquiridos no famoso ‘Plan de Saneamento’, aprobado no ano 2009, e mais no Real Decreto-Lei 20/2011, do Sr. Rajoy, que recollen explicitamente a conxelación da oferta de emprego en todas as administracións para o exercicio 2012.

Agora, as sospeitas e as denuncias do intercambio mutuo de favores entre Prado Verdeal e o actual alcalde de Xinzo, Antonio Pérez, quedan plenamente confirmadas. Coma sempre serán os veciños e veciñas os que paguen dos seus petos as débedas persoais que o Sr. Pérez foi contraendo con todos os que no seu día lle “botaron unha man” para acceder á alcaldía.

19/04/2012

O BNG reclama do Alcalde seriedade e transparencia na concreción do Plan de Axuste

Amador Díaz advirte que as fracasadas políticas do PP da austeridade “selectiva”, das subas de impostos e das baixadas de soldo aos traballadores non serán as que garantan o futuro do Concello de Xinzo.

Xinzo da Limia, a 19 de abril de 2012. Nos últimos días os veciños e veciñas de Xinzo asistimos abraiados ao espectáculo de declaracións cruzadas entre o alcalde do Concello, Antonio Pérez, e os representantes dos traballadores a conta do ‘Plan de Axuste’ aprobado no último plenario.

No BNG coñecemos moi ben os famosos ‘plans’ do PP de Xinzo, papel mollado onde se fala de medidas de aforro en gastos correntes, optimización de recursos, conxelación de contratacións, mais que ao final só se concretan en subas de impostos e taxas. Esta é a experiencia demostrábel do ‘Plan de Saneamento Económico-Financeiro’ do 2009 e é por onde apuntan as directrices deste novo e improvisado ‘Plan de Axuste’ feito ás presas, que carga todo o peso do “axuste” nos veciños e nos traballadores do Concello, esquecendo medidas reiteradamente propostas polo BNG como redución de dietas dos concelleiros, eliminación da inútil adicación exclusiva da concelleira de Persoal, esixencia a outras administracións para que colaboren no financiamento de determinados servizos (como o Conservatorio) por ter carácter comarcal, etc.

Antonio Pérez está empeñado na loábel tarefa de garantir a viabilidade económica do Concello de Xinzo, mais non será aplicando as fracasadas políticas do PP (austeridade “selectiva”, suba de impostos para os veciños e veciñas, baixada de soldo aos traballadores) como o consiga, ademais a súa incoherencia fai que teña aberto un proceso de contratación dun avogado para o Concello que se vai “comer” o 15% dese aforro conseguido en base a precarizar as condicións do persoal laboral actual.

O BNG esixe eficacia, seriedade e transparencia

E todo isto estase a facer de costas á oposición, sen contar para nada con ela, sen explicar en ningún momento as intencións e ocultando información baixo a escusa dos prazos legais. Por isto no día de hoxe vimos de solicitar a reunión URXENTE da Comisión de Economía e Facenda para que o alcalde dea conta das medidas de redución salarial propostas aos traballadores na reunión do 17/4/2012, así coma do resto de medidas de aforro previstas polo grupo de goberno e avance as liñas xerais do Proxecto de Orzamentos para o 2012.

O BNG ofrece alternativas máis xustas

Diante deste “máis do mesmo” que nos plantexa o alcalde do PP, dende o BNG presentaremos unha alternativa máis equilibrada, cunha batería de medidas diversificadas, que non fará recaer todo o peso do axuste nos traballadores e nos veciños e veciñas de Xinzo.

12/01/2012

O BNG solicita a anulación inmediata do proceso de contratación dun avogado do Concello

O BNG de Xinzo rexeita a ocorrencia do alcalde, Antonio Pérez, de facerse cos servizos dun avogado en exclusiva, a cargo do orzamento municipal, ao tempo que sobe taxas e impostos e recorta servizos básicos.

Xinzo da Limia, 12 de xaneiro de 2012. No BOP do 30 de decembro do 2011 publicouse o anuncio de convocatoria dunha praza de letrado/a para o Concello. No BNG vimos de recoller a perplexidade e indignación dos veciños e veciñas de Xinzo que non entenden os motivos desta contratación nun servizo totalmente accesorio e marxinal que non ten ningunha consecuencia directa na súa calidade de vida. Resulta curioso e chamativo que Antonio Pérez, representante dunha forza como o PP, partidaria de privatizar prestacións básicas como a educación, a sanidade, a atención aos maiores e aos dependentes, etc. teña a ocorrencia de facerse cos servizos dun avogado propio cando hai sobrados motivos que desaconsellan a creación desta nova figura, ata o de agora inexistente no Concello de Xinzo, e que deberían levar a un alcalde sensato e que pense no interese xeral dos veciños e veciñas a desistir inmediatamente deste despropósito.

Estamos a falar dun Concello en permanente estado de excepción financeira, asfixiado no capítulo de ingresos, que recorta servizos básicos e que xa adica máis do 60% do orzamento a Gastos de Persoal ao que se lle vai engadir unha nova lousa en forma de praza de funcionario que non figura recollida na RPT e que, en ningún caso, lle vai saír aos veciños por menos de 65.000€ anuais. Coa creación deste novo posto estanse a incumprir vergoñentamente os compromisos adquiridos no famoso ‘Plan de Saneamento’, aprobado no ano 2009, que recollía explicitamente a “conxelación da oferta de emprego”, resulta impresentábel que este plan só sirva de escusa para subirlle os impostos aos veciños. E, finalmente, como o Sr. Pérez vai por libre e ao Sr. Rajoy non lle fan caso nin os seus, esta medida está a contradicir o acordado polo goberno do estado español, do propio PP, a través do Real Decreto-Lei 20/2011 que establece que “durante o ano 2012 non se procederá á incorporación de novo persoal, nin contratado, nin funcionarial a non ser por causa de forza maior”, o cal, evidentemente, non é o caso.

Queremos lembrarlle ao Sr. Pérez que o realmente produtivo sería reducir a conflitividade xudicial mediante unha xestión acaida dos intereses municipais e que o feito de dispor dun avogado propio non lle vai garantir gañar os procesos nos que se vexa envolto o que, a fin de contas, é o que realmente pode saír caro. Por isto o Grupo Municipal do BNG ven de presentar unha moción na que se lle pide ao actual goberno do PP a paralización inmediata deste proceso de contratación.

19/07/2011

O alcalde de Xinzo, cos nosos respectos, é de segunda… ou de terceira

Hoxe poidemos ler unha abraiante entrevista nun xornal de ámbito nacional co noso flamante e dicharacheiro alcalde na cal disertaba sobre varios temas da actualidade municipal e non deixaba títere con cabeza. Como se trata de temas de interese para as veciñas e veciños de Xinzo vémonos na obriga de facer un breve “repaso” puntualizando algunhas cuestións.

Antonio Pérez «Nós somos o PP e todo o que non estea aí chamarase doutro xeito. Gustaríame que quedara claro que non hai ruptura no PP.»

Trátase dunha lea interna, a nós danos o mesmo, mais, Sr. Pérez, por máis que repita vostede este mantra non se vai facer realidade e iso sabémolo todos. Empeza vostede mentindo en algo que é evidente para todo o mundo, así que… como imos fiarnos do que nos diga no resto das cuestións que o incumben?

A.P. «Prioridades: parque empresarial [...] N-525 e o río Limia, dúas asignaturas pendentes de toda a vida.»

Vostede o dixo: asignaturas pendentes de toda a vida, dos “gobernos” do PP de toda a vida, e como vostede é do PP de toda a vida, permítanos que non nos fagamos moitas ilusións, e se non, ao tempo.

A.P. «Determinados sectores e grupos políticos queren mesturar un prantexamento que fixo este grupo de goberno novo, dunha planta de reciclaxe, o que sería un segundo Sogama, e isto non ten nada que ver coa incineradora. Non ten nada que ver unha cousa con outra. Intentaremos traer esa planta de reciclaxe e poñela onde se poda instalar.»

Desde logo en Gudín xa non vai poder ser, o seu primeiro foguete saíulle pola culata e vergoñentamente non tivo o valor de ir explicar vostede mesmo o “proxecto” aos veciños aos que quince días antes adulaba e lles prometía o ouro e o mouro para conquerir o seu voto. Mais, por certo, cal planta de “reciclaxe” vai traer?, que xa non se aclara nin vostede, mestura a “Sogama 2″ que, resulta que non vai ser unha incineradora e que vai tratar o lixo exemplarmente, reciclando e todo o demáis, moi verde e moi ecolóxica pero que vostede agora non quere ver nin en pintura cando antes non lle facía ascos, con esta outra que vai facer, en teoría, o mesmo, pero que non ten nada que ver. Mire, este é o proxecto que vostede e o seu partido teñen para a Limia: convertirnos nun vertedoiro. Primeiro foi a ilegal, inútil e inviábel Planta de tratamento de Refugallos en Morgade, logo veu a Planta de Depuración de Lodos, que viña para Xinzo e a última hora foi para Sandiás, pero está en Xinzo, despois a Incineradora e agora esta nova Planta de Refugallos que lle querían “empaquetar” aos veciños de Gudín, coas consecuencias que todos coñecemos.

A.P. «Por primeira vez Portos vai investir cartos nun cauce fluvial de interior [...] imos pór enriba da mesa da Confederación todos os estudos que nos piden para facer o porto. Pero Pérez Bouza, unha vez máis, quere falar como senador de A Limia e como non vive nela non se entera.»

Mire Sr.Pérez, quen non se entera é vostede e así nos vai aos veciños e veciñas de Xinzo. Como vostede saberá o “cachondeo” na vila é xeneralizado e a noticia foi portada ata en medios do resto do Estado, pero vostede teime e xogue ese papel de político incisivo e de discurso agresivo tan do gusto da neo-dereita populachera e jallejista.

E, por certo, Xosé Manuel Pérez é, por desgraza, o único senador que ten a Limia, malia que algún que lle deixou a vostede o sillón quente se sente tamén naquel organismo, e preguntou polo tema como pregunta, se interesa e reclama centos de temas de interese para Galiza e o que lle contestou o goberno é o que vostede xa sabe, si, vostede atribuirá todo á confabulación bipartito-masónica-zapateril orquestrada para ningunear e marxinar as súas iniciativas, pero as cousas son como son, non hai informes, non hai “vistobueno”, xa sabemos que a vostedes, acostumados á chapuza sistémica, ao chanchullo paliativo e a resolver todo en “petit comité” chirríanlles estes incómodos tecnicismos, mais así lles funciona a administración.

A.P. «¿Subirán impostos ata o 2013? -Polo de agora en Xinzo de Limia non temos intención de subir imposto algún.»

Home, Sr. Antonio Pérez, non nos faga rir, para unhas cousas é vostede tan directo e tan incisivo e para outras agóchase nas trampas da linguaxe. Mire, vostede subiu os impostos (IBI) hai cinco meses, e vostede vai subir os impostos novamente o ano que ven, e o seguinte. É vostede moi amigo deste tipo de falacias verbais, como cando lle preguntaban en pleno se había en curso algún proceso de contratación de persoal e vostede dicía “neste momento non”, claro, nese preciso e exacto momento non, pero aos cinco minutos si. Xa está ben, suba os impostos se quere pero non nos tome o pelo, Sr. Pérez.

A.P. «A reforma de Trandeiras debería terse feito en tempos de bonanza»

Nos tempos de bonanza do Sr. Vila, que tan amábelmente lle cedeu a alcaldía hai nove meses. Roma non paga a traidores. Na bonanza prometida polo Sr. Feijoo, presidente da Xunta do PP, que ía rematar ca crise en mes e medio.

A.P. «Vilar de Santos xoga noutra división. O seu alcalde, fixo un brindis ó sol ofrecendo terreos para a empresa Xero. O polígono de Vilar de Santos, con todos os meus respectos, é de segunda»

Noraboa, Sr. Pérez, vai vostede facendo amigos por onde pasa. Mire, é certo que Vilar de Santos xoga noutra división, dende hai moitos anos, eles están en primeira e nós en terceira rexional. Teñen un polígono rematado e operativo dende moito antes que o noso, agora teñen chan clasificado, urbanizado e listo para ocupar mañá, ademais con capacidade de ampliación. Non teñen unha mellor conexión coa A52 porque vostedes se encargaron de boicoteala no seu momento para despois darnos a razón ao recoñecer que Xinzo precisa esa circunvalación que nós reclamamos. Quen fai “brindis ao sol” é vostede, o seu mentor, Sr. Baltar, e o PP, que lle ofrecen unha chapuza á empresa Xero en vísperas electorais consistente na expropiación, clasificación, urbanización e posta a disposición en tempo record de chan industrial nun concello do seu (do seu do PP, digo) interese, no que non había NADA, nin de primeira, nin de segunda nin de NADA. Por certo, o mesmo que nos pasa a nós coa célebre CICAT, que xa presentaron tamén dúas ou tres veces, que lle ían urbanizar unha nova fase no parque empresarial, que era todo inminente… e aínda estamos agardando.

A.P. «A Universidade, por encargo noso, fixo un RTP. En principio van adaptarnos xente que temos a eses postos. Se non, haberá que reducir. Pero polo que sei, non sei se sobraban 5 ou 7 persoas. De momento non hai nada e será unha decisión que non vou tomar só.»

E logo, Sr. Alcalde, dille aos outros que “non se enteran” e vostede leva catro anos e pico aí metido e aínda non leu a famosa RPT. Sr. Pérez, engana vostede novamente e toma por parvos aos veciños. A RPT di que chegan 84 traballadores no Concello, nos últimos orzamentos aprobou vostede un anexo de persoal con 132 prazas… faga a conta, os seus estudos empresariais deberían axudalo. E non fale dela “en terceira persoa” como se a cousa non fora con vostede, a RPT tiña que aplicala o seu precedesor e non o fixo así que o morto pende agora sobre a súa cabeza.

 Filed under: En destaque
Páxinas: 1 2 Seguinte

bng
2003-2013, Grupo Local do Bloque Nacionalista Galego de Xinzo da Limia
R/ Río Arnoia, 14 - Local 18 (Multicentro - 1ªandar) | 32630 Xinzo da Limia - Ourense (Galiza, UE) | Tlf/Fax: 988461360
www.bng-xinzo.org | @bngxinzo | info@bng-xinzo.org

Cretos | Privacidade e seguridade | Condicións de uso

Todo o contido desta web está baixo unha licenza Creative Commons Recoñecemento 3.0 se non se indica o contrario

208 queries - 0,205 segundos | Powered by WordPress